काठमाडौं– साताको दोस्रो कारोबार दिन सोमबार नेपाल स्टक एक्सचेन्ज (नेप्से) मा हालसम्मकै उच्च कारोबार भएको छ। आज १३ अर्ब १७ करोड रुपैयाँबराबरको सेयर कारोबार भएको छ, जुन हालसम्मकै बढी दैनिक कारोबार हो।
यसदिन २१६ कम्पनीको २ करोड ७१ लाख ४० हजार २०२ कित्ता सेयर १३ अर्ब १७ करोड ५३ लाख ५३ हजार १८८ रुपैयाँमा खरिद बिक्री भएको छ। नेप्से सूचक पनि ३.०७ अंकले बढेर २८२३.०६ विन्दुमा पुगेको छ, जुन हालसम्मकै उच्च विन्दु हो। सोमबार सेन्सेटिभ इन्डेक्स पनि १.३१ अंकले बढेको छ।
सोमबार निर्जीवन बीमा कम्पनीहरुमा लगानीकर्ताको आकर्षण बढी देखिएको छ। उक्त कम्पनीहरुमा लगानीकर्ताको आकर्षण बढ्दा निर्जीवन बीमा उपसमूहको सूचक १.३९ प्रतिशतले बढेको छ।
सोमबार कारोबारमा आएका ४ कम्पनीको सेयर सकारात्मक सर्किट लेभलमा कारोबार भएको छ। यस दिन वरुरुण हाइड्रोपावरको सेयर मूल्य सबैभन्दा धेरै ९.९५ प्रतिशतले बढेको छ।