काठमाडौं - नेकपा एमालेको स्थायी कमिटी बैठक आज पनि बस्दै छ। प्रधानमन्त्री निवास बालुवाटारमा स्थायी कमिटीको बैठक बस्न लागेको पार्टी कार्यालय सचिव शेरबहादुर तामाङले जानकारी दिए।
उनका अनुसार अपरान्ह ४ बजे बैठक बस्न लागेको हो। पार्टीको आन्तरिक विवाद, बजेटको तयारी र पछिल्लो राजनीतिक घटनाक्रममा नै बैठक केन्द्रित हुने उनले जानकारी दिए।
आजको बैठकले शनिबार बसेको स्थायी कमिटी बैठकले स्पष्टीकरण सोधिएका नेता माधवकुमार नेपाल, झलनाथ खनालसहितका ११ जनाका विषयमा पनि आवश्यक कारबाही प्रक्रिया अघि बढाउन सक्ने देखिएको छ।
२४ घन्टे स्पष्टीकरण सोधिएका ती सांसदहरूले आजसम्म पनि स्पष्टीकरण नबुझाएकाे तामाङले जानकारी दिए। शनिबार बसेको स्थायी कमिटी बैठकले स्पष्टीकरण सोधेको थियो।
‘उहाँहरूलाई स्पष्टीकरणको जवाफ दिने समय आज बिहानसम्म थियो। अहिलेसम्म जवाफ प्राप्त भएको छैन,’ एक नेताले भने, ‘आजको बैठकले थप कारबाही गर्न सक्छ।’