काठमाडौं- नेकपाका जनवर्गीय संगठन एकीकरणका लागि केन्द्रीय सदस्यहरूको ठूलो संख्या टाउको दुःखाइको विषय बनेको छ ।
खासगरी, तत्कालीन माओवादीका जनवर्गीय संगठनको ठूलो संंख्या देखेर एकीकरण कार्यदल तनावमा परेको एक सदस्यले जानकारी दिए । पूर्वमाओवादीका अधिकांश जनवर्गीय संगठनका केन्द्रीय समिति सदस्यको संख्या तीन अंकमा छ । अर्थात्, जनसंगठनहरूका केन्द्रीय समिति दुई सयदेखि आठ सय ५० सदस्यीयसम्म छन् । एमालेका भने अधिकांश संगठन दुई सयको आसपास मात्र छन् ।
तत्कालीन एमालेको पेशागत महासंघ नेपालको केन्द्रीय कमिटी ८६ र तत्कालीन माओवादीको पेशागत संगठन आठ सय ५० सदस्यीय छ । इन्जिनियरिङ संगठनको केन्द्रीय कमिटीको आकार बराबरी रहे पनि बाँकी सबै भातृ संगठनहरू तत्कालीन एमालेको तुलनामा माओवादीका धेरै ठूला छन् ।
नेताहरूले पार्टीका भातृ संगठनहरूको नाममा रहेका पुच्छर हटाएर एकता गर्ने बताउँदै आएका छन् । तत्कालीन माओवादीको पूर्वजनमुक्ति सेनाको संगठनलाई भूतपूर्व सैनिक-प्रहरी संगठन तथा जनयुद्ध र जनक्रान्तिका घाइते तथा अपांगता रहेकाहरूको संगठनलाई एउटै अपांग संगठनमा मिलाउने तयारी छ । तत्कालीन एमालेका २२ र माओवादी केन्द्रका २४ जनवर्गीय संगठन थिए ।
अहिले जनवर्गीय संगठन एकीकरण गर्न कार्यदल बनेका छन् । मजदूरमा विष्णु रिमाल, जयपुरी घर्ती, विनोद श्रेष्ठ र गणेश रेग्मी छन् । तत्कालीन एमालेको नेपाल ट्रेड्र युनियन महासंघ (जिफन्ट)को ५१ सदस्यीय केन्द्रीय कमिटी छ । माओवादी केन्द्रको अखिल नेपाल ट्रेड युिनयन महासंघ (अन्टुक)को एक सय ६९ सदस्यीय केन्द्रीय कमिटी छ ।
किसान संगठनमा एकीकरणका लागि वामदेव गौतम, हरिबोल गजुरेल, केशवलाल श्रेष्ठ र चित्रबहादुर श्रेष्ठको कार्यदल छ ।
तत्कालीन एमालेको अखिल नेपाल किसान महासंघमा वामदेव गौतम अध्यक्ष रहेको एक सय ७५ सदस्यीय केन्द्रीय कमिटी छ । माओवादीतर्फको अखिल नेपाल किसान महासंघ क्रान्तिकारीमा चित्रबहादुर श्रेष्ठ अध्यक्ष रहेको तीन सय ५१ सदस्यीय केन्द्रीय कमिटी छ ।
महिला संगठनको एकीकरणका लागि राधा ज्ञवाली, गोमा देवकोटा, उर्मिला अर्याल र अमृता थापामगर रहेको कार्यदल छ ।
तत्कालीन एमालेको अखिल नेपाल महिला संघमा गोमा देवकोटा अध्यक्ष रहेको एक सय ९६ सदस्यीय केन्द्रीय कमिटी छ । माओवादीको अखिल नेपाल महिला संघ (क्रान्तिकारी) अमृता थापामगर अध्यक्ष रहेको पाँच सय ७५ सदस्यीय छ ।
युवा संघ एकीकरणका लागि मणि थापा, महेन्द्र पाण्डे, रमेश पौडेल र रामप्रसाद सापकोटा रहेको कार्यदल छ । यसमा तत्कालीन एमालेको युवा संघ नेपालमा अध्यक्ष रमेश पौडेल नेतृत्वको दुई सय ५१ तथा माओवादीको वाईसीएल नेपालमा रामप्रसाद सापकोटा अध्यक्ष रहेको दुई सय १३ सदस्यीय केन्द्रीय समिति छ ।
रविन्द्र अधिकारी, हितमान शाक्य, नवीना लामा र रञ्जित तमाङ रहेको विद्यार्थी संगठन एकीकरण कार्यदल बनेको छ । तत्कालीन एमालेको अनेरास्ववियुमा नविना लामा अध्यक्ष रहेको दुई सय सदस्यीय केन्द्रीय कमिटी छ । यसमा ४५ जना आयोग सदस्य छन् । माओवादीको अखिल क्रान्तिकारीमा रञ्जित तामाङ अध्यक्ष रहेको दुई सय ४३ सदस्यीय केन्द्रीय कमिटी छ ।
गीत–संगीत कला क्षेत्रको एकीकरण कार्यदलमा मणि थापा, खगेन्द्र राई, प्रेमनाथ अधिकारी र सरल सहयात्री छन् । तत्कालीन एमालेको राष्ट्रिय जनसांस्कृतिक महासंघमा खगेन्द्र राई अध्यक्ष रहेको ६५ सदस्यीय केन्द्रीय कमिटी छ । माओवादीको नेपाल जनसांस्कृतिक महासंघमा सरल सहयात्री अध्यक्ष रहेको एक सय ६५ सदस्यीय छ ।
यस्तै, पृथ्वीसुब्बा गुरुङ, देवप्रसाद गुरुङ, सुरेश आले मगर र गोकुल घर्ती सदस्य रहेको कार्यदलले जनजातिसम्बन्धि संगठन एकीकरण गर्ने छ ।
तत्कालीन माओवादीका जनवर्गीय संगठनको ठूलो संंख्या देखेर एकीकरण कार्यदल तनावमा परेको छ ।
तत्कालीन एमालेको नेपाल लोकतान्त्रिक आदिवासी जनजाति महासंघमा प्रदेश–४ का मुख्यमन्त्री पृथ्बी सुब्बा गुरुङ अध्यक्ष रहेको एक सय सात सदस्यीय केन्द्रीय कमिटी र ५९ वटा घटक संगठन छन् । माओवादीको राष्ट्रिय मुक्ति मोर्चामा सुरेश आलेमगर अध्यक्ष रहेको केन्द्रीय समिति छ । यसमा केन्द्रीय समितिको यकिन अभिलेख कार्यदलले प्राप्त गर्न सकेको छैन ।
मातृका यादव, रघुवीर महासेठ, जगदिश कुसियत र रामकुमार शर्मा रहेको कार्यदलले मधेशी संगठनको एकीकरण गर्ने भएको छ । तत्कालीन एमालेको लोकतान्त्रिक मधेशी संगठनमा भौतिक पूर्वाधार मन्त्री रघुवीर महासेठ अध्यक्ष रहेको आठ सय ५१ सदस्यीय केन्द्रीय कमिटी छ । र, माओवादीको मधेशी राष्ट्रिय मुक्तिमोर्चामा रामकुमार शर्मा अध्यक्ष छन् । मोर्चाले पनि सबै केन्द्रीय सदस्यको अभिलेख उपलब्ध गराएको छैन ।
यसैगरी, सराज अहमद फारुखी, हकिकुल्ला खाँ, जुनैद अन्सारी र अतहर हुसेन रहेको मुस्लिम संगठन एकता कार्यदल गठन भएको छ ।
तत्कालीन एमालेको नेपाल मुस्लिम इत्तेहाद संगठनमा सराज अहमद फारुखी अध्यक्ष रहेको एक सय ३१ सदस्यीय केन्द्रीय कमिटी छ । माओवादीको मुस्लिम मुक्तिमोर्चा नेपालमा हकिकुल्ला खाँ अध्यक्ष रहेको एक सय ३५ सदस्यीय केन्द्रीय कमिटी छ ।
दलित संगठन एकीकरणका लागि बोमबहादुर विश्वकर्मा, तिलक परियार, जितु गौतम र दलजीत सिरपाइली सदस्य रहेको कार्यदल छ । एमालेको नेपाल उत्पीडित जातीय मुक्ति समाजमा जितु गौतम अध्यक्ष रहेको एक सय २५ सदस्यीय केन्द्रीय कमिटी छ । माओवादीको दलित मुक्ति मोर्चामा अध्यक्ष दलजित सिरपाइली अध्यक्ष रहेको एक सय ५१ सदस्यीय केन्द्रीय कमिटी छ ।
बुद्धिजीवीसँग सम्बन्धित संगठन एकीकरणका लागि दिनानाथ शर्मा, टंक कार्की, दिनेशचन्द्र देवकोटा र नरेश भण्डारी सदस्य रहेको कार्यदल छ । तत्कालीन एमालेको नेपाल बुद्धिजीवी परिषद्मा डा. दिनेशचन्द्र देवकोटा अध्यक्ष रहेको ८२ सदस्यीय केन्द्रीय कमिटी छ । माओवादी निकट अखिल नेपाल बुद्धिजीवी संगठनमा नरेश भण्डारी अध्यक्ष रहेको तीन सय ३३ सदस्यीय कमिटी छ ।
पेशागत कर्मचारी संगठन एकताका लागि जनार्दन शर्मा, विश्वनाथ प्याकुरेल, प्रेमल खनाल र दयाराम बस्यालको कार्यदल छ । तत्कालीन एमालेको पेशागत महासंघ नेपालमा विश्वनाथ प्याकुरेल अध्यक्ष रहेको ८६ सदस्यीय केन्द्रीय कमिटी छ । माओवादीको नेपाल राष्ट्रिय कर्मचारी महासंघमा दयाराम बस्याल अध्यक्ष रहेको आठ सय ५० सदस्यीय केन्द्रीय कमिटी छ ।
भूतपूर्व सैनिक-प्रहरी एकीकरणका लागि चक्रपाणि खनाल, धनबहादुर चन्द, हरि राई र जीवनबहादुर बुढाको कार्यदल छ ।
तत्कालीन एमालेको नेपाल राष्ट्रिय भूतपूर्व सैनिक तथा प्रहरी संगठनमा धनबहादुर चन्द अध्यक्ष रहेको ६५ सदस्यीय केन्द्रीय कमिटी छ । माओवादीको भूतपूर्व सैनिक संगठन र पूर्वजनमुक्ति सेना संघमा जीवनबहादुर बुढा अध्यक्ष रहेको केन्द्रीय कमिटी छ । यसको पनि संख्या यकिन छैन ।
योगेश भट्टराई, पम्फा भुसाल, गणेश बस्नेत र महेश्वर दाहाल रहेको पत्रकार एकीकरण कार्यदल छ । तत्कालीन एमालेको प्रेस चौतारी नेपालमा गणेश बस्नेत अध्यक्ष रहेको ९९ सदस्यीय केन्द्रीय कमिटी छ । माओवादीको प्रेस सेन्टर नेपालमा महेश्वर दाहाल अध्यक्ष रहेको एक सय ५१ सदस्यीय केन्द्रीय कमिटी छ ।
मानवअधिकार एकीकरण कार्यदलमा विजय सुब्बा, मीनबहादुर शाही, विष्णुपुकार श्रेष्ठ र दिनमणि पोखरेल छन् ।
तत्कालीन एमालेको मानवअधिकार एलाइन्समा मीनबहादुर शाही अध्यक्ष रहेको ५१ सदस्यीय केन्द्रीय कमिटी छ । माओवादीको अखिल नेपाल मानव अधिकार संगठनमा दिनमणि पोखरेल अध्यक्ष रहेको केन्द्रीय समिति छ ।
अपांग संगठन एकीकरणका लागि विजय सुब्बा, दीपेन्द्र पुन मगर, मित्रलाल शर्मा र टेकनाथ न्यौपानेको कार्यदल छ ।
तत्कालीन एमालेको लोकतान्त्रिक राष्ट्रिय अपांग संगठन नेपालमा मित्रलाल शर्मा अध्यक्ष छन् । माओवादी केन्द्रको अखिल नेपाल क्रान्तिकारी अपांग संघमा दीपेन्द्र पुन अध्यक्ष रहेको ५१ सदस्यीय केन्द्रीय कमिटी छ ।
तत्कालीन एमालेको पेशागत महासंघ नेपालको केन्द्रीय कमिटी ८६ र तत्कालीन माओवादीको पेशागत संगठन आठ सय ५० सदस्यीय छ ।
खेलकुद/खेलाडी कार्यदलमा टोपबहादुर रायमाझी, कर्ण थापा, पुरुषोत्तम पौडेल र शिव कोइराला छन् ।
तत्कालीन एमालेको नेपाल लोकतान्त्रिक खेलकुद महासंघमा पुरुषोत्तम पौडेल अध्यक्ष रहेको एक सय ३० सदस्यीय केन्द्रीय कमिटी छ । माओवादीको अखिल नेपाल खेलकूद महासंघमा शिव कोइराला अध्यक्ष रहेको दुई सयमाथिको केन्द्रीय कमिटी छ ।
कानुन कार्यदलमा वर्षमान पुन, रघुजी पन्त, रमण श्रेष्ठ र रुद्र नेपाल छन् । तत्कालीन एमालेको प्रगतिशील तथा पेशागत कानुन व्यवसायी संगठनमा रुद्र नेपाल अध्यक्ष रहेको ७२ सदस्यीय केन्द्रीय कमिटी छ । माओवादीको गणतान्त्रिक प्रगतिशील कानुन व्यवसायी एसोसिएसन नेपालमा रमण श्रेष्ठ अध्यक्ष रहेको सयमाथिको केन्द्रीय कमिटी छ ।
भूमिहीन सुकुम्बासी कार्यदलमा हरिबोल गजुरेल, रामप्रित पासवान, शत्रुघ्न महतो र दीपक थापा छन् । तत्कालीन एमालेको नेपाल भूमिहीन सुकुम्बासी संगठनमा रामप्रित पासवान अध्यक्ष रहेको ३३ सदस्यीय केन्द्रीय कमिटी छ । माओवादीको अखिल नेपाल सुकुम्बासी संगठनमा दीपक थापा अध्यक्ष रहेको एक सयमाथिको कमिटी छ ।
उद्योगी–व्यवसायी कार्यदलमा मुकुन्द न्यौपाने, कुलबहादुर केसी, भरत श्रेष्ठ र श्याम पाठक छन् । तत्कालीन एमालेको नेपाल उद्योग तथा व्यवसायी महासंघ भरत श्रेष्ठ अध्यक्ष र माओवादीको राष्ट्रिय उद्योग व्यापार महासंघमा श्याम पाठक अध्यक्ष छन् ।
पेशागत इन्जिनियर एकीकरण कार्यदलमा गोकर्ण विष्ट, पम्फा भुसाल, डा. हरिराम पराजुली र शम्भुबहादुर श्रेष्ठ सदस्य छन् ।
तत्कालीन एमालेको पेशागत तथा प्रगतिशील इन्जिनियर एसोसिएसन नेपालमा डा. हरिराम पराजुली तथा माओवादीको नेपाल राष्ट्रिय प्रगतिशील इन्जिनियरमा शम्भुबहादुर श्रेष्ठ अध्यक्ष रहेको ३५/३५ सदस्यीय केन्द्रीय कमिटी छ ।
प्रवासी मञ्च कार्यदलमा तिल विश्वकर्मा, लोकनाथ भण्डारी, लक्ष्मण पन्त र इश्वरी भण्डारी छन् ।
प्रकाशित: Dec 31, 2017| 18:23 आइतबार, पुस १६, २०७४