काठमाडौं - नेकपा एमालेले वरिष्ठ नेता झलनाथ खनाल र माधव नेपालसहित ११ सांसदलाई स्पष्टीकरण पत्र पठाएको छ।
कार्यालय सचिव शेरबहादुर तामाङले आज स्पष्टीकरण सोधिएका ११ जनालाई नै पत्र पठाइएको जानकारी दिए।
उनले कसैको इमेलमा त कसैलाई भाइबरमार्फत् पत्र पठाइएको जानकारी दिए। प्रधानमन्त्री निवास बालुवाटारमा बसेको स्थायी कमिटीको बैठकले शेरबहादुर देउवालाई प्रधानमन्त्री बनाउन हस्ताक्षर गरेका २६ मध्ये ११ जनालाई स्पष्टीकरण सोध्ने निर्णय गरेको थियो।
एमालेले वरिष्ठ नेताद्वय खनाल र नेपालसँगै भीम रावल, मुकुन्द न्यौपाने, कल्याणी खड्का, रामकुमारी झाँक्री, सरला यादव, पुष्पाकुमारी कर्ण, लक्ष्मी चौधरी, कलिला खातुन र नीरा जैरुलाई स्पष्टीकरण सोध्ने निर्णय गरेको हो।
यी ११ जना मध्ये खनाल, नेपाल र रावल मात्रै प्रत्यक्षतर्फ निर्वाचित सांसद हुन्। बाँकी ८ जना समानुपातितर्फका हुन्।