बुटवल - रूपन्देहीको तिलोत्तमा नगरपालिकाले चालु शैक्षिक सत्रमा बाँकी रहेको विद्यालय तहको वार्षिक परीक्षा नगरी आन्तरिक मूल्यांकनबाट नतिजा सार्वजनिक गर्ने भएको छ।
कोरोना महामारीका कारण नगरपालिकाको निर्देशनअनुसार कक्षा ३ सम्मको परीक्षा विद्यालयले वैशाख १२ गतेअघि नै लिइसकेका थिए।
बाँकी कक्षाको परीक्षा वैशाख १२ बाट सुरु भएकोमा कोरोना महामारी बढेपछि सोही दिनबाटै परीक्षा रोकिएको थियो। परीक्षा दिन सक्ने अवस्था नरहेको भन्दै नगर शिक्षा समितिले आन्तरिक मूल्यांकनमार्फत् परीक्षाफल प्रकाशित गर्ने निर्णय गरेको हो।
शिक्षा समिति संयोजकसमेत रहेका नगर प्रमुख वासुदेव घिमिरेले सबै सामुदायिक तथा संस्थागत विद्यालयले जेठ ३१ गते एकसाथ आन्तरिक मूल्यांकनमार्फत् परीक्षाफल प्रकाशन गर्ने निर्णय गरेको बताए।
आन्तरिक मूल्यांकनको लागि त्रैमासिक परीक्षा र अर्धवार्षिक परीक्षामा प्राप्त अंकको ४०/४० प्रतिशत तथा विद्यालयमा रहेको विद्यार्थीको अभिलेखको आधारमा २० प्रतिशत तय गर्नुपर्ने मापदण्ड निर्धारण गरेको प्रमुख प्रशासकीय अधिकृत प्रदीप पौडेलले जानकारी दिए।
कक्षा ८ को नगरस्तरीय परीक्षाको लागि समेत सोहीअनुसारको मापदण्डको आधारमा मूल्यांकन गरी त्यसको विवरण जेठ २५ गतेभित्र शिक्षा शाखामा पठाउन विद्यालयलाई सूचित गरेको छ।