निषेध आदेशमा यात्रु ओसार्ने चालकविरुद्ध मुद्दा दर्ता

धनगढी - डोटीमा निषेध आदेशमा यात्रु बोक्ने दुई चालकविरुद्ध मुद्दा दर्ता गरिएको छ।

कोरोना महामारी नियन्त्रण तथा रोकथामका लागि जिल्लामा गरिएको लकडाउनको अवज्ञा गरी यात्रु बोकेको भन्दै दुईवटा जिप चालकविरूद्ध मुद्दा दर्ता गरिएको हो ।

जिप तथा चालकलाई संक्रामक रोग ऐन बमोजिम मुद्दा दर्ता गरी आवश्यक कारबाहीका लागि जिल्ला प्रशासन कार्यालयमा पठाएको जिल्ला प्रहरी कार्यालयका मुद्दा फाँटका प्रमुख प्रहरी निरीक्षक कान्तिराज जोशीले बताए। 

यात्रु बोकेर अछामबाट कैलालीतर्फ जाँदै गरेका से १ ज १०४७ र बा १३ च ३३७१ नम्बरको जीप र चालकलाई दिपायलबाट नियन्त्रणमा लिइएको जिल्ला प्रहरी कार्यालय डोटीका प्रमुख प्रहरी उपरीक्षक दानबहादुर मल्लले बताए।