देउवालाई समर्थन गर्ने सांसदलाई एमालेले कारबाही गर्ने

काठमाडौं– नेकपा (एमाले) ले शेरबहादुर देउवालाई प्रधानमन्त्रीका लागि समर्थन गर्ने सांसदलाई कारबाहीको चेतावनी दिएको छ।

अध्यक्ष केपी ओली निकट सांसद तथा केन्द्रीय कार्यालय सचिव शेरबहादुर तामाङले माधव नेपालगायत सबै सांसद एमाले संसदीय दलका सदस्य भएको भन्दै त्यसो गर्नै नसक्ने प्रतिक्रिया दिए।

‘शेरबहादुर देउवालाई समर्थन गरेको हो भने उहाँहरु सांसद रहनुहुन्न। यो कुराको जानकारी राष्ट्र«पति कार्यालयलाई पनि गराइसकेका छौं। उहाँहरु छानबिनको दायरा हुनुहुन्छ। कतिपयले त हस्ताक्षर दुरुपयोग भयो भन्नुभएको छ।’

हिजो बिहीबार राष्ट्रिय सभा सदस्यका लागि भएको उपनिर्वाचनमा एमालेको माधव नेपाल पक्षका कतिपय मतदाताले पार्टीका उम्मेदवार रामबहादुर थापालाई भोट हालेका थिएनन्। ‘हिजोको घटनाबाट पनि उहाँहरु (माधव नेपाल पक्ष) एमालेमा नरहने देखियो,’ तामाङले भने। 

केपी ओलीले प्रधानमन्त्रीका लागि पर्याप्त आधार प्रस्तुत गरेको उनले दाबी गरे। प्रधानमन्त्री ओलीले १५३ जना सांसदको हस्ताक्षरसहित राष्ट्रपति कार्यालयमा प्रधानमन्त्रीका लागि दाबी प्रस्तुत गरेका छन्।