काठमाडौं– पार्टी एकता जोगाएर अघि बढ्ने भन्दै जेठ ४ गते संयुक्त हस्ताक्षर गरेका जसपाका अध्यक्षद्वय महन्थ ठाकुर र उपेन्द्र यादवबीचको सहमति छोटो समयमै टुटेको छ।
पछिल्लो राजनीतिक घटनाक्रमले पुनः जसपाभित्रको विवाद छताछुल्ल भएको छ। कार्यकारिणी समितिको बैठकको विषयलाई लिएर पुनः दुई धार देखा परेको छ।
अध्यक्ष महन्थ ठाकुरले कोभिड १९ को कारण देखाउदै पार्टीको कार्यकारिणी समितिको बैठक स्थगित भएको विज्ञप्ति निकालेका थिए। लगत्तै अर्का अध्यक्ष उपेन्द्र यादवले पनि विज्ञप्ति निकालेर बैठक स्थगित नभएको प्रष्ट पारेका छन्।
विभिन्न विषयमा विचार विमर्श गरी निष्कर्षमा पुग्न पर्ने भएकाले पूर्व निर्धारित बैठक स्थगित नभएको विज्ञप्तिमार्फत जानकारी दिएका छन्। उनले तोकिएको समयमा नै बैठक बस्ने जनाएका छन्। पार्टी केन्द्रीय कार्यालय बालकुमारीमा शनिबार र आइतबार बैठक बस्ने भएकाले अनिवार्य उपस्थितिका लागि अनुरोध समेत गरेका छन्।
जसपाको ५१ सदस्यीय कार्यसिमितिमा यादवको बहुमत छ। यादव पक्षको बहुमत भएकै कारण महन्थ राजेन्द्र पक्षले बैठक छल्दै आएको बताइएको छ।