राष्ट्रियसभा सदस्य उपनिर्वाचनमा ३३८ मत खस्यो, नतिजा आजै आउने

काठमाडौं– बागमती प्रदेश अन्तर्गत राष्ट्रियसभामा रिक्त सदस्य पदका लागि भएको उपनिर्वाचन सम्पन्न भएको छ। 

हेटौंडाको भुटनदेवी माविमा बिहीबार भएको निर्वाचनमा ३३८ जनाले मतदान गरेको सहायक मतदान अधिकृत गोविन्दप्रसाद पौडेलले जानकारी दिए। उनका अनुसार १० जना भने अनुपस्थित भएका छन्। 

प्रदेशसभाका १०५ र स्थानीय तहका गाउँपालिका अध्यक्ष, उपाध्यक्ष, नगरपालिकाका प्रमुख, उपप्रमुख २३३ जनाले मतदान गरेका छन्। प्रदेशसभा तर्फका चार र स्थानीयतर्फका ५ जना अनुपस्थित रहेको निर्वाचन अधिकृतको कार्यालयले जनाएको छ। 

आजको निर्वाचनमा २५ जना कोरोना संक्रमित मतदाताले मतदान गरेका छन्। बागमतीमा प्रदेशसभातर्फ ११० र स्थानीयतर्फ २३८ गरी ३४८ मतदाता थिए। जसमा प्रदेशसभा सदस्य पशुपति चौलागाईंको मृत्यु भएको थियो। मतदानको नतिजा आजै सार्वजनिक गरिने पौडेलले जानकारी दिए।

उनले मतगणनाको आवश्यक तयारी भइरहेको र केहीबेरमा सुरु गरिने बताए।