काठमाडौ - नेपाल उद्योग वाणिज्य महासंघले क्षेत्रपाटीस्थित पुरानो गोर्खा अस्पतालको भवनलाई कोभिड आइसोलेसन एवं प्राथमिक उपचार केन्द्र बनाएको छ। आइशोलेशन केन्द्रको महासंघका अध्यक्ष शेखर गोल्छा, पूर्वउपप्रधानमन्त्री प्रकाशमान सिंह र काठमाडौं महानगरपालिकाकी उपमेयर हरिप्रभा खड्गी (श्रेष्ठ) ले संयुक्त रुपमा सोमाबार शुभारम्भ गरेका छन्।
आइसोलेसन केन्द्रको उद्घाटन गर्दै पूर्व उपप्रधानमन्त्री सिंह र महानगरपालिकाकी उपमेयर खडगीले बिरामीका लागि यो प्रभावकारी हुने र आफ्नोतर्फबाट सक्दो सहयोग गर्ने प्रतिवद्धता जनाएका थिए।
उक्त आइशोलेशन एवं प्राथमिक उपचार केन्द्र स्थापना एवं सञ्चालन गर्ने सम्बन्धमा नेपाल उद्योग वाणिज्य महासंघ र काठमाडौं महानगरपालिका वडा नम्वर १७ बीच गत वैशाख ३० गते एक समझादारीपत्रमा हस्ताक्षर भएको थियो।
महासंघका अध्यक्ष गोल्छाले कोभिड महामारी मुलुकका लागि यतिखेर निकै ठूलो चुनौती भाएकाले यसलाई परास्त गरी आम सर्वसाधारणको स्वास्थ्य सुरक्षामा सहयोग गर्न महासंघ दत्तचित्त भई लागेको बताए।