काठमाडौं- सरकारले नेपाल प्रहरी र सशस्त्र प्रहरीमा अतिरिक्त महानिरीक्षक (एआईजी)को दरबन्दी घटाएको छ ।
मन्त्रिपरिषद् बैठकले आइतबार नेपाल प्रहरीमा तीन र सशस्त्रमा दुई मात्र एआईजी राख्ने निर्णय गरेको हो । नेपाल प्रहरीमा एआईजी संख्या सातबाट १५ सम्म पुगेको थियो । सशस्त्रमा पनि १० एआईजी थिए ।
सशस्त्र प्रहरीमा हाल रहेका एआईजीहरूको दरबन्दी मिलान कसरी गर्ने भन्ने निर्णय मन्त्रिपरिषद्ले गरेको छैन । नेपाल प्रहरी अस्पतालमा मात्र अहिले एआईजी छन् । प्रशासनतर्फका एआईजीहरू बढुवा भएका छैनन् ।
हालसम्म नेपाल प्रहरीमा प्रशासन, कार्य, अपराध अनुसन्धान र मानवस्रोत विभाग तथा महानगरीय प्रहरी आयुक्तको कार्यालय, राष्ट्रिय प्रहरी प्रशिक्षण प्रतिष्ठान र अस्पतालको कमान्ड एआईजीले गर्दै आएका थिए ।
प्रहरी प्रधान कार्यालयका तीन वटा विभागको कमान्डमा मात्र एआईजीहरू रहने स्रोतको भनाइ छ । प्रहरी प्रवक्ता एसएसपी शैलेश थापा क्षत्रीले मन्त्रिपरिषद्को निर्णय प्राप्त भइनसकेकाले त्यसबारे विस्तृत जानकारी नभएको बताए ।
नेपाल प्रहरीमा आगामी तीन वर्षभित्र पदपूर्ति गर्ने गरी १६ सय दरबन्दी थपिएको छ । जसमा थप एक एआईजी प्राविधिक, १४ एसपी, १२ डीएसपी र ५० इन्स्पेक्टरको दरबन्दी बढेको छ ।
प्रकाशित: Dec 31, 2017| 18:23 आइतबार, पुस १६, २०७४