ब्राजिलमा यसरी पढाउँदैछन् माधव नेपाल र नारायणकाजी

काठमाडौं- पूर्वप्रधानमन्त्री तथा नेपाल कम्युनिस्ट पार्टीका वरिष्ठ नेता माधवकुमार नेपालले ब्राजिलमा नेपालमा माक्र्सवादको सिर्जनात्मक प्रयोग र जनताको जनवादबारे प्रशिक्षण दिइरहेका छन् । उनीसहित नेकपाको केन्द्रीय सचिवालय सदस्य नारायणकाजी श्रेष्ठ गत बिहीबारदेखि नियमित डेढ घण्टा प्रशिक्षण दिन्छन् । 

ब्राजिलको वामपन्थी पार्टीनिकट 'थिंक ट्यांक' भूमिहीन श्रमिक आन्दोलन (एमएसटी)ले १३ वर्षदेखि सञ्चालन गरिरहेको 'फल्लोरेस्टन फर्नान्डेज नेसनल स्कुल'मा दुवै नेता प्रशिक्षकको भूमिकामा छन् ।

उक्त स्कुलमा ५० देशका प्रशिक्षार्थी छन् । नेपालका पनि पाँच विद्यार्थी अध्ययनरत छन् । 

नेपाली कम्युनिस्ट आन्दोलनले शान्तिपूर्ण प्रतिस्पर्धाको बाटोबाट हासिल गरेको अभूतपूर्व उपलब्धि र समाजवादतर्फको यात्राबारे वरिष्ठ नेता नेपालले प्रकाश पारेको उनका स्वकीय सचिव मोहन गौतमले जानकारी दिए । 



तत्कालीन एमाले र माओवादीबीच एकीकरणपछि गठित नेकपाले अवलम्बन गरिरहेको अन्तरिम कार्यक्रम 'जनताको जनवाद'सँगै 'जनताको बहुदलीय जनवाद'बारे पनि उनले प्रशिक्षण दिएका छन् । 

श्रेष्ठले पनि नेपाली कम्युनिस्ट आन्दोलन र पार्टी एकीकरणका सन्दर्भमा अनुभव राखे । दुवै नेताले कम्युनिस्ट पार्टीका नेता तथा संस्थाका पदाधिकारीहरूसँग दुई देशको सम्बन्ध र स्कुल सञ्चालनको मोडलबारे कुराकानी गरेका छन् ।

३४ वर्षअघि स्थापित एमएसटीका दुई लाख सदस्य छन् । उक्त संस्थाले सञ्चालन गरेको स्कुलबाट ल्याटिन अमेरिकासहित विश्वका विभिन्न देशका वामपन्थी पार्टीका ४२ हजार नेता/कार्यकर्ता दिक्षित भइसकेका छन् । 

सन् २००६ देखि उक्त स्कुलमा राजनीतिक विषयसँगै अन्तर्राष्ट्रिय मामिला पनि अध्यापन हुँदै आएको छ ।