बाँके - बाँकेका विभिन्न अस्पतालमा भर्ना भएका थप ११ संक्रमितको गए राति मृत्यु भएको छ।
भेरी अस्पताल नेपालगञ्जमा ६ र शिक्षण अस्पताल कोहलपुरमा पाँच गरी ११ को उपचारका क्रममा मृत्यु भएको जिल्ला कोभिड संकट व्यवस्थापन केन्द्रका स्रोत व्यक्ति तेज वलीले जानकारी दिए।
उनका अनुसार भेरी अस्पताल नेपालगन्जमा उपचाररत गुलरिया नगरपालिका-९ बर्दियाकी ४७ वर्षीया महिला, वनगाडकुपिण्डे नगरपालिका सल्यानका ५० वर्षीय पुरुष, नेपालगञ्ज उपमहानगरपालिका-५ का ४४ वर्षीय पुरुष, नेपालगञ्ज-१६ की ४९ वर्षीया महिला, बर्दिया मधुवन नगरपालिका-६ का ५५ वर्षीय पुरुष र बढैयाताल गाउँपालिका बर्दियाका ६५ वर्षीय पुरुषको मृत्यु भएको हो।
यसैगरी शिक्षण अस्पताल कोहलपुरमा उपचाररत कैलाली घोडाघोडी नगरपालिका-१ का ६० वर्षीय पुरुष, कोहलपुर नगरपालिका-२ का ३० वर्षीया महिला, कोहलपुर-१० की ४५ वर्षीया महिला, कोहलपुर-११ का ४१ वर्षीय पुरुष र कोहलपुर-१४ की ६४ वर्षीया महिलाको पनि गएराति मृत्यु भएको जिल्ला कोभिड संकट व्यवस्थापन केन्दका स्रोत व्यक्ति वलीले जानकारी दिए।
योसँगै बाँकेमा कोरोनाबाट मृत्यु हुनेको संख्या जिल्लाभित्रका २०४ र बाहिरी जिल्लाबाट उपचार गराउन आएका १५७ गरी ३६१ जना पुगेको छ।