काठमाडौं- नेपाली कांग्रेसका नेता गगन थापाले प्रधानमन्त्री केपी ओलीलाई देशमा कोरोना महामारीको अवस्थामा योभन्दा आकस्मिक कार्य के छ भन्दै प्रश्न गरेका छन्।
उनले केही दिनअघि प्रधानमन्त्रीले ओलीले देशमा अक्सिजनको समस्या छैन, सिलिण्डरको कमी मात्र हो भर्न अभाव हुँदैन भनेको स्मरण गर्दै अहिले तपाईँलाई यो भन्दा आकस्मिक काम के परेको छ भन्ने प्रश्न गरेका हुन्।
सामाजिक सञ्जाल फेसबुकमा पूर्व स्वास्थ्यमन्त्रीसमेत रहेका थापाले अहिले काठमाडौं बाहिर मात्र नभई काठमाडौंकै कयौँ अस्पतालमा अक्सिजन पुनः भर्न नपाएर सञ्चालक र स्वास्थ्यकर्मी अत्तालिएको उल्लेख गरेका छन्।
थापाले लेखेका छन्, ‘प्रधानमन्त्रीज्यू केही दिन अघिसम्म अक्सिजनमा समस्या छैन, सिलिण्डरको कमी हो, भर्न अभाव हुँदैन भनेर प्रचारबाजी हुँदैथियो। अहिले काठमाडौं बाहिर मात्र हैन भित्रकै कयौँ अस्पतालमा अक्सिजन पुनः भर्न नपाएर सञ्चालक र स्वास्थ्यकर्मी अत्तालिएका छन्। आजका दिनमा योभन्दा आकस्मिक कार्य के छ तपाइँको?’