भैरहवाको युनिभर्सल कलेजले पनि कोरोनाका बिरामी नलिने  

बुटवल- रुपन्देहीको भैरहवास्थित युनिभर्सल कलेज अफ मेडिकल साइन्सेज शिक्षण अस्पताल (युसीएमएस) ले पनि अक्सिजनको अभावमा बिरामी भर्ना नलिने चेतावनी दिएको छ।

मेडिकल कलेजले बुधबार विज्ञप्ति जारी गर्दै दैनिक ५ सयभन्दा बढी अक्सिजन खपत भएको भन्दै अक्सिजन सिलिन्डर नपाउँदा उपचारमा समस्या आएको उल्लेख गरेको छ। मेडिकल कलेजले दैनिक ८ सय सिलिन्डर अक्सिजनको व्यवस्था गर्न प्रदेश सरकार, स्थानीय तह तथा प्रशासनको ध्यानाकर्षण गराएको छ।

मेडिकल कलेजले कोभिड संक्रमित बिरामीको चापलाई मध्यनजर गरी सञ्चालनको तयारीमा रहेको ६० बेडको एचडियूू पनि अक्सिजनकै कारण सञ्चालन गर्न नसक्ने विज्ञप्तिमा उल्लेख गरिएको छ। अस्पतालमा विरामीको चाप थेग्न नसक्ने अवस्था आएकाले अक्सिजन उपलब्ध नभए बिरामी भर्ना लिन नसक्ने भएरै सरकारको ध्यानाकर्षण गराउन विज्ञप्ति जारी गर्नुपरेको कलेजका जनसम्पर्क अधिकृत सुशील गुरुङले जानकारी दिए।

आजमात्रै नेपालगन्ज मेडिकल कलेजले अक्सिजन अभावका कारण कोरोनाका थप बिरामी लिन नसक्ने बताएको थियो।