नेपाली-अंग्रेजी भाषामा देशवासीका नाममा प्रधानमन्त्रीको सम्बोधन

काठमाडौं- प्रधानमन्त्री केपी शर्मा ओलीले सोमबार देशवासीका नाममा सम्बोधन गरेका छन्।

नेपाल टेलिभिजनमार्फत् गरेको सम्बोधनका क्रममा उनले कोरोना भाइरस संक्रमण नियन्त्रणका लागि सरकारले व्यापक रुपमा काम गरिरहेको दाबी गरे।

सम्बोधनको सुरुमै उनले गत वर्ष सरकारले लिएका रणनीतिले कोरोनाविरुद्ध विजय प्राप्त गरेको बताए। साथै उनले यो वर्ष निषेध आदेश गरिएका जिल्लामा यसलाई कडाइ गर्दै लैजाँदै जाने पनि उल्लेख गरे।

प्रधानमन्त्री ओलीले गत वर्षको लकडाउन खुलेसँगै हेलचक्र्याईँ बढेको र त्यसका कारण संक्रमण तीव्र रुपमा फैलिएको जिकिर गरे।

सम्बोधनमा उनले आइतबार बसेको मन्त्रिपरिषद् बैठकले गरेका केही निर्णयहरु पनि सार्वजनिक गरे।

मन्त्रिपरिषद् बैठकले आज २० गते रातिदेखि आन्तरिक हवाई उडान बन्द गर्ने निर्णय गरेको छ। यस्तै वैशाख २२ गतेदेखि अन्तर्राष्ट्रिय उडान बन्द गरिने, भारतसँग जोडिएको ३५ नाकामध्ये २२ वटा नाका बन्द गरी १३ वटा नाकामात्रै सञ्चालनमा ल्याउने मन्त्रिपरिषद् बैठकको निर्णय प्रधानमन्त्री ओलीले सुनाए।

सम्बोधनमा ओलीले सरकारले स्वास्थ्यकर्मीलाई जोखिम भत्ता, कोरोना नियन्त्रणका लागि अन्तरमन्त्रालय समन्वय लगायतका कुरामा जोड दिए।

साथै सबैलाई सजग बन्न, आतंकित नहुन तर होसियार हुन आग्रह गरे।

धेरै लामो सम्बोधन नगरेका प्रधानमन्त्री ओलीले आफ्नो सम्बोधनको सार कुरा अंग्रेजीमा पनि भने। नेपाली भाषाको सम्बोधन सकेपछि त्यसैको संक्षिप्त विवरण अंग्रेजी भाषामा पनि सुनाए।