काठमाडौं - नेपाल सुपर लिग (एनएसएल) अन्तर्गत आइतबारबाट चौथो चरणका खेल सुरु भएका छन्। ६ चरणमा हुने खेलमा शनिबार तेस्रो चरणका खेल सकिएका थिए।
चौथो चरणको खेल चल्दै गर्दा खेलहरू निकै दबाबपूर्ण बनेपछि शीर्षस्थानमा पुग्नका लागि पेचिलो प्रतिस्पर्धा जारी छ। अर्थात् लिगमा अहिलेसम्म शीर्षस्थानमा पर्ने टिमको टुंगो लागेको छैन।
आधा खेल सकिँदा शीर्ष चारमा पर्ने टिमको टुंगो लाग्न सक्ने अनुमान थियो। तर, जारी लिगका खेलहरू लगातार बराबरीमा रोकिँदा शीर्ष चार टिमको टुंगो लाग्न नसकेको हो।
यो लिगमा पछिल्ला पाँच खेलमध्ये चार खेल बराबरीमा रोकिएका छन्। गत बिहीबार सम्पन्न खेलमा ललितपुरले धनगढीसँग १–१ गोलको बराबरी खेल्यो।
त्यसको भोलिपल्ट शुक्रबारको खेलमा काठमाडौं र पोखराले गोलरहित बराबरी खेले। यता धनगढीले शनिबारको पहिलो खेलमा चितवनविरुद्ध जित निकालेपछिका दुई खेल पुनः बराबरी भएका थिए।
शनिबारको दोस्रो खेलमा बुटबल लुम्बिनीले विराटनगरसँग २–२ गोलको बराबरी खेलेको थियो। त्यस्तै आइतबार पोखराले ललितपुरसँग गोलरहित बराबरी खेल्यो।
सरसर्ती हेर्दा प्रतियोगितामा १२ खेल सम्पन्न भए, जसमध्ये ६ खेलमा जितहार भए पनि बाँकी खेल बराबरीमै रोकिए।
खेल बराबरीमा रोकिनुलाई नेपाली राष्ट्रिय टिमका मुख्य प्रशिक्षक अब्दुल्लाह अल्मुताइरी खेलको स्तर बढेको बताउँछन्। उनका अनुसार धेरै प्रतिस्पर्धात्मक खेल हुनु धेरै महत्त्वपूर्ण कुरा हो। यसले खेलाडीको स्तर विकास गर्न सहयोग गर्छ।
एनएसएलकै आज (सोमबार)को खेलमा विराटनगर सिटी फुटबल क्लब र चितवन फुटबल क्लब भिड्दैछन्।
यो खेल दुवै टिमका लागि निकै महत्त्वपूर्ण छ। किनभने विराटनगरले पहिलो खेलमा धनगढीविरुद्ध जित निकाले यता अर्को जित निकालेको छैन। पोखरासँग हार बेहोरेको थियो भने बुटबलसँग बराबरी खेलेको थियो। त्यसैले उसलाई शीर्ष चारमा कायम रहन जित अत्यावश्यक छ।
यता चितवन तालिकाको पुछारमा छ। भरत खवास, विकास खवासलगायत केही विदेशी खेलाडीलाई चोटले सताएपछि उसले जित निकान्न सकेको छैन। तीन खेलबाट दुई बराबरी र एक हार बेहोरिसकेको छ।
उसले सुरुआती दुई खेल बराबरी खेल्यो भने तेस्रो खेलमा हार बेहाेर्यो। यसकारण दुई अंकका साथ चितवन पुछारमा छ।
आज साँझ साढे ५ बजे हुने खेलमा यी दुई टिम नै बिग्रिएको लयलाई सुधार गर्दै जित निकाल्ने लक्ष्यमा केन्द्रित हुनेछन्।