मबाट पनि कमजोरी र गल्ती भएका छन्, आत्मालोचित छु : वामदेव गौतम

काठमाडौं- नेपाल कम्युनिस्ट पार्टी (एमाले)का नेता वामदेव गौतमले आफूबाट कमजोरी र गल्ती भएको भन्दै आफू आत्मालोचित भएको बताएका छन्। विश्व मजदूर दिवसका अवसरमा फेसबुकमा स्टाटस लेख्दै नेता गौतमले आफूबाट भएका कमजोरी र गल्तीप्रति आत्मालोचित भएको उल्लेख गरेका हुन्। 

'आजको दिन गल्ती/कमजोरीप्रति आत्मालोचित हुँदै नेपाली कम्युनिस्ट आन्दोलनलाई पुनः एकताबद्ध गर्छौ भनेर प्रतिबद्धता व्यक्त गर्ने दिन हो,' नेता गौतमले लेखेका छन्, 'मबाट पनि यसबीच केही कमजोरी र गल्ती भएका छन्। आफ्ना गल्ती र कमजोरीप्रति आत्मालोचित छु। तिनलाई सच्याउन लागी परेको पनि छु। भविष्यमा सबै तथ्यहरु क्रमशः स्पष्ट हुँदै जानेछन्।' 

श्रमजीवीवर्गका नेताले सत्तास्वार्थबाट प्रेरित भएर श्रमजीवीकै आन्दोलनलाई छियाछिया बनाइरहेको उनको ठहर छ। यी क्रियाकलाप रोक्न नसके प्रतिगमन प्रतिस्थापित हुने उनको भनाइ छ।