एमालेद्वारा गण्डकी प्रदेशसभा अवरुद्ध

पोखरा– नेकपा एमालेले मंगलबार गण्डकी प्रदेशको चालू विशेष अधिवेशनको दोस्रो बैठक अवरुद्ध गरेको छ। एमाले सांसद राजीव पहारीले कोरोनाको महामारीका बेला पीसीआर टेस्ट नगरी संसद् चलाइएको भन्दै वैठक रोक्न माग गरेपछि एमाले सांसद बसेको सिटबाट उठेका थिए। 

एमाले सांसद सिटबाट उठेपछि सभामुख नेत्रनाथ अधिकारीले २० मिनेटको लागि बैठक स्थगित गरेका छन् । बैठक अवरुद्ध गर्नुको कारण पीसीआर जाँच भनिए पनि मुख्यमन्त्री पृथ्वी सुब्बा गुरुङविरुद्धको अविश्वास प्रस्तावमाथि हुने छलफल  अल्मल्याउन एमालेले सदन अवरुद्ध गरेको विपक्षीको आरोप छ। 

एमाले गण्डकी प्रदेश संसदीय दलका मुख्य सचेतक मायानाथ अधिकारीले पीसीआर नभएको भन्दै संसद् अवरुद्ध गर्ने बताउँदै आएका थिए। आफूमाथि अविश्वास प्रस्ताव टेबुल भएपछि मुख्यमन्त्री गुरुङ सत्ता जोगाउने अन्तिम कसरतमा लागेका छन् । उनले विपक्षी दलहरुसँगको कुराकानी घनीभूत पारेका छन्। 

सोमबार टेबुल भएको अविश्वासको प्रस्तावमा मंगलबार पक्ष विपक्षमा छलफल हुने र बुधबार मतदात हुने संसदको कार्यसूची छ।