बैंगलोरसँग पराजित हुँदै त्रिभुवन आर्मी एएफसी कपबाट बाहिरियो

काठमाडौं – भारतको गोवामा बुधबार राति सम्पन्न खेलमा बैंगलोर फुटबल क्लबसँग पराजित हुँदै त्रिभुवन आर्मी फुटबल क्लब एएफसी कपको प्रिलिमिनरी राउन्डबाटै बाहिरिएको छ।

गोवाको जीएमसी रंगशालामा भएको खेलमा आर्मी ५–० गोलअन्तरले पराजित हुँदै एएफसी कपबाट बाहिरिएको हो।

खेलको प्रहिलो हाफ प्रतिस्पर्धात्मक बने पनि कमजोर देखिएको आर्मीमाथि बैंगलोरले निरन्तर दबाब बनाएको थियो। तर, गोल सम्भव नभएपछि खेल भने गोलरहित बराबरीमा रोकियो।

दोस्रो हाफको ५१औं मिनेटमा इन्डियाका राहुल भेखेले गोल गर्दै बैंगलोरलाई अग्रता दिलाएका थिए। पहिलो गोलको एक मिनेट नबित्तदै सुनिल क्षेत्रीले गोल गरेपछि घरेलु टिमले दुई गोलको अग्रता बनायो।

त्यस्तै, खेलको ६१  मिनेटमा ब्राजिलयन फरवार्ड क्लेइटन सिल्वाले गोल गरेपछि तीन गोलको अग्रताबनाएको बैंगलोरलाई उनले नै ६५औं मिनेटमा गोल गर्दै चार गोलको अग्रता पुर्‍याए।

६५औं मिनेटमै भेखेले पुनः गोल गरेपछि बैंगलोरले खेलको दोस्रो हाफको १५ मिनेटबीच नै पाँच गोल पुरा गर्‍यो। त्यसपछि भने गोल संभव हुन सकेन।

यससँगै आर्मी प्रिलिमिनरी राउन्डबाट बाहिरिएको छ। बैंगलोर भने अर्को चरणमा प्रवेश गरेको छ।

आर्मीले प्रिलिमिनरी अघिको प्ले अफमा श्रीलंका पुलिसलाई ५–१ गोलले पराजित गरेको थियो।