काठमाडौं - एएफसी कप प्रिलिमिनरी राउन्डअन्तर्गतको दोस्रो चरणको खेलमा आज त्रिभुवन आर्मी फुटबल क्लबले बैंगलोर फुटबल क्लबको सामना गर्दैछ।
आज राति पौने ८ बजेबाट सुरु हुने खेल गोवाको जीएमसी रंगशालामा हुनेछ।
तुलनात्मक रुपमा बलियो मानिएको बैंगलोर क्लबमा इन्डिन राष्ट्रिय टिमका खेलाडीसमेत छन्। अन्तर्राष्ट्रिय गोलमा मेस्सीलाई समेत पछि पारेका सुनिल क्षेत्री रहेको क्लबमा स्पेन, ब्राजिल र अष्ट्रेलियाका खेलाडी छन्।
बार्सिलोना बी, मायोर्का बी जस्ता टिमबाट खेलिसकेका खेलाडी बैंगलोरमा हुनुले नेपाली टिमलाई चुनौती थपेको छ। यता आर्मीका केही खेलाडीलाई कोभिड–१९ को संक्रमण देखिएपछि उनीहरू खेलमा सहभागी बन्न पाएनन्।
यी सबै खेलाडीको अनुभव र महत्व बुझेका आर्मीका प्रशिक्षक नवीन न्यौपानेले यो खेललाई निकै चुनौतीको रुपमा लिएका छन्। उनी भन्छन्, ‘यो खेलमा हाम्रो लक्ष्य पछिल्लो खेलमा गरेका गल्ती नदोहोर्याउने रहने छ। हामी बेस्ट दिनेछौं। तर, कोभिड लागेका खेलाडीको अभाव चाहिँ हामीमाझ रहने नै छ।’
त्रिभुवन आर्मी क्लबले सहिद स्मारक ए डिभिजन लिगमा दोस्रो हुँदै प्रिलिमिनरी राउन्ड प्रवेश गरेको थियो। २०१९–२० को आईएसएलमा तेस्रो स्थानमा रहेको बैंगलोर पनि दक्षिण एसियाबाट प्रिलिमिनरी राउन्डमा प्रवेश गरेको हो।