समाचार

प्रधानमन्त्री भन्छन्, महामारीलाई धान्ने प्रणाली अपुग भएको हो, कोल्याप्स भएको छैन

1621097748.jpg
विभिन्न अस्पतालका सञ्चालक, चिकित्सक, विज्ञ, अक्सिजन उत्पादक, वितरक, निजी क्षेत्र, मन्त्री र सरकारी निकायसँग शनिबार विशेष छलफल गर्दै प्रधानमन्त्री केपी शर्मा ओली।

काठमाडौं– प्रधानमन्त्री केपी शर्मा ओलीले कोरोना महामारीलाई धान्ने प्रणाली अपुग भए पनि कोल्याप्स नभएको दाबी गरेका छन्।विभिन्न अस्पतालका सञ्चालक, चिकित्सक, विज्ञ, अक्सिजन उत्पादक, वितरक, निजी क्षेत्र, मन्त्री र सरकारी निकायसँग शनिबार विशेष छलफल गदै ओलीले भने, ‘हाम्रो स्वास्थ्य प्रणाली नै कोल्याप्स भयो भन्नेजस्ता टर्मिनोलोजी प्रयोग नगरौं। महामारी धान्ने प्रणाली अपुग भएकाे हाे। त्यसैले प्रणाली कोल्याप्स भएको होइन।’ उनले  यसअघि नभएका प्रणालीलाई पनि सबीचमा विस्तार गरेकाे बताए।

उनले महामारीबाट बिरामी भएका नागरिकको उपचारका लागि आवश्यक पर्ने अक्सिजन लगायत अन्य उपकरणको तत्काल व्यवस्थापनका लागि निर्देशन दिए। प्रधानमन्त्री ओलीले त्यसको नियन्त्रणका लागि सरकारले चालेका कदमका विषयमा जानकारी दिँदै विभिन्न निकायले गर्नुपर्ने कामबारे निर्देशन दिएका थिए। 

तत्कालको काम अक्सिजन आपूर्ति

प्रधानमन्त्री ओलीले नागरिकको जीवनरक्षाका लागि आवश्यक अक्सिजन आपूर्ति, उत्पादन र वितरणमा लाग्न निर्देशन दिए। घरघरमा अक्सिजनको सिलिन्डिर राख्ने र अस्पतालमा अक्सिजन अभाव हुने गरेकोप्रति लक्षित गर्दै उनले त्यसका लागि आवश्यक सचेतना आवश्यक रहेको बताए। ‘सुरक्षाका मापदण्ड नअपनाउने, कोभिड लाग्छ भनेर अक्सिजन घरमै लगेर राख्ने प्रवृत्ति बढेको छ। यसले अस्पतालका बिरामीलाई पनि बचाउन सक्दैन र घरमा राखेको अक्सिजनले पनि काम गर्दैन’, प्रधानमन्त्री ओलीले भने, ‘यस कुरामा जनचेतना जगाउनु आवश्यक देखियो।’ 

सरकारले तत्काल अक्सिजन आपूर्ति, उत्पादन र वितरणलाई प्राथमिकता दिएको उनको भनाइ थियो। ओलीले भने, ‘अक्सिजन खरिद र वितरणका लागि तत्काल केके गर्नुपर्छ गर्ने, निजी अस्पतालमा बढेको नाफाखोर प्रवृत्ति हटाउने, भेन्टिलेटर अपुग भए तत्काल मगाएर त्यसको पूर्ति गर्ने काम गर्नुपर्‍यो। मानवीय संकटको बेला ३५ दिने सूचना पर्खेर बसे नागरिकको ज्यान जान्छ।’ 

बिरामीलाई खोजेको औषधि र अन्य उपचार सामग्री नपाएर मर्छु भन्ने मनोविज्ञानबाट समेत मुक्त गर्नुपर्ने प्रधानमन्त्री ओलीको भनाइ थियो। ‘बिरामीले मैले खोजेको औषधि पाउँदिनँ, अक्सिजन पाउँदिनँ भन्ने सोच्नु नपरोस्’, प्रधानमन्त्रीले भने, ‘तत्काल उपलब्धता र सुलभताका लागि तपाईंहरु सबैको सक्रियता आवश्यक छ।’  

अफवाह फैलाएर ह्यारेसमेन्ट नगरौं 

प्रधानमन्त्री ओलीले मानवीय संकटका बेला तत्काल आवश्यक सामग्री खरिद गर्दा अफवाह फैलाएर जे कुरामा पनि भ्रष्टाचार नै हुन्छ भन्ने स्थायी प्रचारले काम गरिरहेकाको मनोबल गिर्नेतर्फ सचेत रहन आग्रह गरे। ‘भ्रष्टाचार भयो भने क्षम्य हुँदैन, तर मानव संकटलाई राजनीतिकरण गर्न स्थायी रुपमा भ्रष्टाचारको अफवाह फैलाएर महामारीसँग अग्रमोर्चामा लडिरहेकालाई ह्यारेसमेन्ट गर्ने, कदनाम गर्ने र कामबाट निरुत्साहित गर्ने प्रवृत्ति छ’, ओलीले भने, ‘मानवीय रक्षाका लागि गरेका प्रयासलाई विकृत रुपमा व्याख्या गर्ने पेसा नै भएकाहरुसँग सजग रहेर महामारीबाट जनतालाई बचाउनुपर्छ।’ 

महामारीलाई राजनीति लाभको विषय नबनाऔं 

प्रधानमन्त्री ओलीले महामारीको सामना मिलेर गर्नुपर्ने बताए। उनले राजनीतिक विपक्षीहरुले सरकारले कामै गरेर भनेर महामारीबाट लाभ लिने प्रयास गरेको पनि बताए। ‘हाम्रा विपक्षीले भनेजस्तो सरकारले केही नगरेको होइन, सरकारले गरेको छ, गर्छ र गर्नेछ’, उनले भने, ‘सिमसिम पानीमा छाता ओढेर ओत लागेजस्तो आँधी आउँदा छाताले थेग्दैन। त्यस्तै भएको हो।’

छलफलमा सीसीएमसी र स्वास्थ्य मन्त्रालयका तर्फबाट अहिले भएका कामबारे रिपोर्ट प्रस्तुत गरिएको थियो। उपत्यकाका विभिन्न अस्पतालका सञ्चालक, अक्सिजन उत्पादक र वितरकहरुले आ–आफ्नो तर्फबाट महामारी नियन्त्रण प्रभावकारी बनाउनेबारे सुझाव दिएका थिए।

प्रतिक्रिया दिनुहोस्
थप समाचार
लेखकबाट थप
ताजा अपडेट