काठमाडौं– नेकपा (एमाले) का अध्यक्ष केपी शर्मा ओलीले आफूले हालै गठन गरेको दशौं राष्ट्रिय महाधिवेशन आयोजक कमिटीको बैठक बोलाएका छन्।
प्रधानमन्त्रीसमेत रहेका ओलीले ६ वैशाखका लागि बैठक बोलाएका हुन्। समसायिक राजनीतिक विषयमा पार्टीको धारणा तय गर्न बैठक बोलाइएको एमालेका प्रमुख सचेतक विशाल भट्टराईले जानकारी दिए। बैठक ६ गते प्रधानमन्त्री निवास बालुवाटारमा बिहान ११ बजे बस्नेछ।
एमाले केन्द्रीय कमिटीको हालै सम्पन्न दशौं, एघारौं र बाह्रौं बैठकले केन्द्रीय कमिटीलाई महाधिवेशन आयोजक कमिटीमा रुपान्तरण गर्दै पार्टीमा अध्यक्ष र महासचिवमात्र पदाधिकारी राख्ने निर्णय गरेको थियो। यो निर्णयलाई एमालेको माधव नेपाल–झलनाथ खनाल समूहले भने अवैधानिक भन्दै आएको छ।
उक्त समूह सहभागी नभएको बैठकले २६४ सदस्यीय महाधिवेशन आयोजक कमिटी गठन गरेको थियो।
आयोजक कमिटीमा राखिएका माधव नेपाल, सुरेन्द्र पाण्डे, भीम रावल र घनश्याम भुसाल पार्टीबाट निलम्बन भइसकेका छन्।