उपेन्द्रलाई भित्र्याउँदा बालुवाटारमा चार घण्टा तनाव  

काठमाडौं- संघीय समाजावादी फोरमका अध्यक्ष उपेन्द्र यादवलाई सपथ खुवाउन राष्ट्रपति कार्यलयमा शुक्रबार तीन बजेका लागि समय तय भइसकेको थियो । तर, अचानक रक्षामन्त्री नेकपा सचिवालय सदस्य ईश्वर पोखरेल दुई बजे बालुवाटार छिरेपछि झण्डै चार घण्टा बालुवाटार तनावपूर्ण रह्यो ।

त्यसबीचमा अनेक अनुमान र आशंका भइरहे । शपथको समय पटक-पटक सारियो । शपथको यकिन समय बालुवाटारले दिन नसक्दा उता शीतल निवाससमेत अलमलमा पर्‍यो । 

दिउँसो २ बजे बालुवाटारमा पसेर पोखरेलले आफ्नो वरियताक्रम तलमाथि भए राजिनामा दिने भन्दै कड्किए। प्रधानमन्त्री केपी ओली शुक्रबार दिउँसोसम्म उपप्रधानमन्त्री बनाउने सोचमा थिएनन् ।  फोरम अध्यक्ष यावले स्वास्थ्यमन्त्रीमा चित्त बुझाइसकेका थिए । प्रचलित मर्यादाक्रमअनुसार यादव मन्त्री पोखरेलभन्दा अगाडि हुन्थे। यही थाहा पाएर पोखरेलले बालुवाटार बसेर रडाको मच्चाएको स्रोतको भनाइ छ । पोखरेलले सरकारमा यादवपछिको मर्यादाक्रम स्वीकारेको भए यो सरकारमा उपप्रधानमन्त्री नै  हुने थिएनन्।

दुई बजे पोखरेल बालुवाटारमा पसेर कड्किन थालेपछि प्रधानमन्त्री ओलीले नेकपा अध्यक्ष प्रचण्ड र नेता माधवकुमार नेपाललाई बालुवाटार बोलाए । त्यसपछि अलगै तीन नेताबीच छलफल भयो। छलफलमा अध्यक्ष प्रचण्डले उपाय निकाले, पोखरेल र यादव दुवैलाई उपप्रधानमन्त्री बनाउने। यति हुँदा पनि वरियताको कुरा बाँकी नै थियो ।  फेरि पनि वरियतामा दोस्रोको दावी दुवैको  होला भन्नेमा नेताहरू एकछिन अल्झिए ।

त्यसपछि उपेन्द्र यादवलाई पनि बालुवाटार बोलाइयोे। यादव बालुवाटार आएर छलफलमा सहभागी भए । मन्त्रीमा चित्त बुझाउन लागेका यादवलाई उपप्रधानमन्त्रीको प्रस्ताव 'सरप्राइज' थियो। उनले 'हुन्छ' भन्ने जवाफ दिँदा झण्डै साँंझको ६ बजिसकेको थियो।
 
एकतासँगै महासचिव पद गुमाएपछि रुष्ट बनेका पोखरेल र ओलीबीच पछिल्लो समय त्यति हार्दिक सम्बन्ध छैन । उनलाई आफ्ना निकटहरूसँग आफूलाई 'माइनस' गर्ने डिजाइन भइरहेको बताउने गरेका छन् । एकीकृत पार्टीको 'कोर' छलफलमा पनि उनको सहभागिता पातलिँदै गएको छ । शुक्रबार बालुवाटारमा पोखरेलले देखाएको व्यवहारबाट ओली समूह झस्किएको छ । 

र्इश्वर र उपेन्द्र दुवै उपप्रधानमन्त्री बनेपछि तेस्रो मर्यादाक्रममा रहेका नेकपाका नेता रामबहादुर थापा बादल असन्तुष्ट बनेका छन् ।