काठमाडौं – नेपाली कांग्रेसको केन्द्रीय कमिटी बैठक आज बस्दै छ। पार्टी कार्यालय सानेपामा दिउँसो २ बजे बैठक बस्ने भएको हो।
बैठकमा महाधिवेशन कार्यतालिकाबारे छलफल हुने बताइएको छ। कांग्रेसले क्रियाशील सदस्यताको विवरण तोकिएको मितिमा सफ्टवेयरमा इन्ट्री नगर्ने जिल्लालाई महाधिवेशनमा भाग लिन नदिने तयारी गरेको छ।
बैठकले एउटा मिति तोक्ने र त्यो मितिमा समेत क्रियाशील विवरण इन्ट्री नगरे महाधिवेशनमा भाग लिन नपाउने निर्णय गर्न सक्ने छ।
बैठकमा भौगोलिक समायोजनका सम्बन्धमा केन्द्रीय निर्वाचन समितिले बुझाएको प्रतिवेदनका बारेमा समेत छलफल हुने छ। साथै आफ्नै नेतृत्वमा सरकार बनाउने निर्णय गरेपछि विकसित घटनाक्रम र प्रगतिका बारेमा सभापति शेरबहादुर देउवाले केन्द्रीय समितिलाई जानकारी गराउने छन्।