कैलाली- सडकमा भेटिएको करिब २० हजार रुपैया सम्बन्धितलाई बुझाइएको छ।
धनगढी-खुटिया सडकखण्डअन्तर्गत धनगढी उप महानगरपालिका-५, हसनपुरमा पर्ससहित सडकमा छरिएको अवस्थामा भेटिएको भारतीय ११ हजार १०० रुपैयाँ, १ हजार ७०० नेपाली रुपैयाँका साथै महत्वपूर्ण कागजात सम्बन्धितलाई बुझाइएको हो।
धनगढी उप महानगरपालिका–६, मटियारीका तारादत्त पनेरुलाई भेटिएको रुपैयाँ र महत्वपूर्ण कागजात सामुदायिक प्रहरी सेवा केन्द्र धनगढीका प्रहरी हवल्दार रामसिंह बडालले हस्तान्तर गरे।
सडकमा छरिएको अवस्था भेटिएको नगद र संगै भेटिएको पर्समा रहेको सवारी चालक लाइसेन्सका आधारमा पहिचानपछि सम्पर्क गरेर पनेरुलाई बुझाइएको प्रहरी हवल्दार बडालले बताए।
स्थानीय सुनितादेवी चौधरीले सडकमा पैसा भेटिएको प्रहरीलाई खबर गरेकी थिइन्। सामुदायिक प्रहरी सेवा केन्द्रअगाडि पसल सञ्चालन गरेकी सुनितादेवी चौधरीले सँधै पसलमा आउने विद्यालय जान लागेका विद्यार्थीले भनेपछि आफूले सामुदायिक प्रहरी सेवा केन्द्रका प्रहरीलाई खबर गरेकी थिइन्।
‘विद्यार्थीले खबर गरेपछि एक जना अटो चालकलाई सडकमा छरिएको अवस्थामा रहेको पैसा हेर्न लगाएँ’, चौधरीले भनिन्, ‘खबर पाएपछि सामुदायिक प्रहरी सेवा केन्द्रका प्रहरी आएर रुपैयाँ संकलन गरेका थिए।’ सुनितादेवी चौधरी पत्रकार भिम चौधरीका श्रीमती हुन्।
तारादत्त पनेरुले बुवाको उपचारको लागि भारतीय रुपैयाँ जोहो गरेको बताए। ‘बुवा बिरामी हुनुहुन्थ्यो। उपचारको लागि भारत लग्ने तयारीमा थिएँ’, पनेरुले भने, ट्राउजर लगाएको थिए पैसा हराएको थाहा नै भएन। अहिले पनि इमान्दार मान्छे रहेछन्’ पनेरुले भने, ‘जसले भेटिएको पैसा प्रहरी कहाँसम्म पुगाए।’