पाँच करोड ३० लाख राजस्व छलेको आरोपमा व्यवसायी साहविरुद्ध मुद्दा

काठमाडौं– राजस्व अनुसन्धान विभागले झूटा तथा नक्कली मूल्य अभिवृद्धि कर बिजक प्रयोग गरी राजस्व छलेको आरोपमा अभिनास इन्टरनेसनका सञ्चालक प्रविन्द्र साहविरुद्ध उच्च अदालतमा मुद्दा दायर गरेको छ। 

स्थायी लेखा नम्बर ६०३५७१६२० भएका साहसँग पाँच करोड २९ लाख ८५ हजार एक सय २९ रुपैयाँ बिगो असुल गरी जरिबाना र कैद माग दाबी गरिएको विभागले जनाएको छ। 

सञ्चालक साह र उक्त फर्मको बैंक खाता सञ्चालक मो. जाबिर अन्सारी समेतले मालवसतु स्थानीय खरिद तथा आयात नै नगरी झूटो विवरण देखाएर रकम असुलेको र सरकारी कोषमा दाखिला नगरेको विभागको आरोप छ। 

उनीहरूले मूल्य अभिवृद्धि करबापात एक करोड ८९ लाख ४२ हजार नौ सय ३२, आयकरबापत दुई करोड ९७ लाख १५ हजार आठ सय ३२ र लाभांश करबापत ४३ लाख २६ हजार ३६५ राजस्व चुवाट गरेकाले विभागको विज्ञप्तिमा उल्लेख छ।