फलामे छडको गुणस्तर र तौल दुवैमा ठगी

काठमाडौं– सिमेन्ट र फलामे डण्डीमा गुणस्तरसँगै तौलमा समेत उपभोक्ता ठगिइरहेको पाइएको छ। नापतौल तथा गुणस्तर विभागका अनुसार निर्माण सामग्री सिमेन्ट र फलामे छडको गुणस्तरसँगै तौलमा समेत ठगी गर्ने गरेको पाइएको हो।

विभागले गरेको अनुगमनबाट राजेश हार्डवेयरले फलामे छडको तौलमा ठगी गर्ने गरेको पाइएको हो। विभागका सूचना अधिकारी निराजन पुडासैनीले दिएको जानकारीअनुसार काठमाडौंको बालाजुस्थित राजेश हार्डवेयरले बिक्री गरेको फलामे छड चेकजाँच गर्दा घटी तौल पाइएको हो।

पुडासैनीका अनुसार राजेश हार्डवेयरलाई नापतौल ऐन २०२५ बमोजिम कारवाहीको प्रक्रिया अघि बढाइएको छ। आफूलाई मुलुककै ठूलो हार्डवेयर दावी गर्दै आएको राजेश हार्डवेयरले उपभोक्ताले खरिद गरेको फलामे छड रसिदमा उल्लेख गरे अनुसार नपाइएको विभागले जानकारी दिएको छ।

विभागले यसअघि गत असारयता गरेको अनुगमनबाट विभिन्न सिमेन्ट उद्योगहरु एवं फलामे छड उद्योगहरुले गुणस्तरमा समेत ठगी गर्ने गरेका छन्। गत फागुन २६ मा सम्राट सिमेन्टले नापतौल तथा गुणस्तर विभागबाट एनएस चिन्ह नलिईकनै देव सम्राट प्रिमियम सिमेन्ट ओपीसीमा ५३ ग्रेड उल्लेख गरेको पाइएको थियो।

दाङको सतबरियामा उद्योग रहेको उक्त उद्योगले ४९ ग्रेडको गुणस्तर इजाजत लिएर ५३ ग्रेड (एनएस५७२) मा नेपाल गुणस्तर प्रमाण चिन्ह प्रयोग गरी बिक्री वितरण गर्ने गरेको पाइएको थियो।

त्यस्तै गत कात्तिक ५ गते बारामा रहेको जगदम्बा स्टिल्स प्रालिले मापदण्डविपरीत छड बिक्री गर्ने गरेको पाइएको थियो। १६ मिलिमिटर साइजको फलामे डण्डी (एफई ५०० ब्याच नम्बर डब्ल्यु ७७०३१०) मा कैफियत पाइएको विभागले जनाएको छ। मापदण्ड विपरीत फलामे छड नष्ट गरिएको थियो। त्यस्तै गत भदौमा विभागको प्रयोगशालामा परीक्षण गराउँदा जगदम्बा प्रालिको उत्पादन पनि मापदण्ड विपरीत रहेको पाइएको थियो।

जगदम्बा स्टिल्सको टिएमटी बार १६ मिलिमिटर ब्राण्डमा कार्बको मान ०.३५ प्रतिशत पाइएको थियो।

सम्राट, मंगला सिमेन्ट र जगदम्बाको छड मापदण्डविपरीत