काठमाडौं- विदेशमा हालसम्म ३४९ जना कोरोना संक्रमित नेपालीको मृत्यु भएको गैरआवासीय नेपाली संघले जानकारी दिएको छ। आइतबार थप चार नेपालीको मृत्यु भएसँगै यो संख्या ३४९ पुगेको सङ्घअन्तर्गतको स्वास्थ्य समितिका संयोजक डा सञ्जीव सापकोटाले बताएका हुन्।
उनका अनुसार यो साता कतारमा तीन र रुसमा एक गैरआवासीय नेपालीको कोरोना सङ्क्रमणका कारण मृत्यु भएको हो। शनिबार साँझसम्म हालसम्म २३ देशमा रहेका ३४९ नेपालीको निधन कोरोना संक्रमणबाट भएको संघको भनाइ छ।
संयोजक डा सापकोटाका अनुसार यो साता माल्दिभ्स, मलेसिया, कतार र युएईमा रहेका नेपालीमा थप कोरोना सङ्क्रमण देखिएको छ।
हालसम्म ५४ देशमा ६५ हजार २८७ नेपालीमा कोरोना सङ्क्रमण पुष्टि भएको छ। तीमध्ये ६२ हजार ६६३ कोरोना सङ्क्रमणमुक्त भएका छन्।
पछिल्लो समय नेपालसहित विश्वका विभिन्न मुलुकमा पनि कोरोनाको जोखिम थप बढ्दै गएकाले स्वास्थ्य सावधानी अपनाउन सङ्घले अनुरोध गरेको छ। -रासस