जनकपुरधाम– प्रदेश–२ को प्रदेशसभा परिसरभित्र सवारी दुर्घटना हुँदा प्रदेश प्रमुख रत्नेश्वरलाल कायस्थका अंगरक्षक घाइते भएका छन् ।
दुर्घटनामा कायस्थका अंगरक्षक शिवजीदेव शर्माको खुट्टामा गम्भीर चोट लागेको छ । प्रदेशसभा सचिवालयका शाखा अधिकृत अमरेन्द्र कुसियतले सिक्ने क्रममा बा२च ६५० नम्बरको गाडीबाट शर्मालाई ठक्कर दिएका थिए । शर्मा प्रहरी हवल्दार हुन् ।
घटनामा शर्माको दायाँ खुट्टा काम नलाग्ने अवस्थामा पुगेको धनुषाका प्रहरी उपरीक्षक दीपेन्द्र शाहीले जानकारी दिए । जनकपुर अञ्चल अस्पतालमा उपचार सम्भव नभएपछि थप उपचारका लागि ललितपुरस्थित बी एन्ड बी अस्पताल पठाइएको छ ।
बुधबार राति करिब आठ बजे प्रदेशसभाका मर्यादापालकहरू मेसमा खाना खाने तयारी थिए । क्वार्टर भवनको बरान्डामा प्रदेश प्रमुख कायस्थका अंगरक्षक शर्मा कुर्सीमा बसेर मोबाइल चलाइरहेका थिए ।
गाडी सिक्न बाहिर निकाल्ने क्रममा अनियन्त्रित भएर शर्मालाई ठक्कर दिएको हो ।
प्रकाशित: Dec 31, 2017| 18:23 आइतबार, पुस १६, २०७४