मन्‍‍त्री छान्‍न उपेन्द्र यादवलाई सकस

काठमाडौं- उपेन्द्र यादव नेतृत्वको संघिय समाजवादी फोरमभित्र मन्त्री छान्ने विषयमा बिवाद देखिएको छ । आकांक्षी धेरै भएपछि मन्त्री छान्ने जिम्मा अध्यक्ष यादवलाई दिइएको छ ।
 
यादवले मंगलबार र बुधबार दिनभर कसरत गरे पनि मन्त्रीको नाम टुङ्ग्याउन सकेनन् । भागबन्डा अनुसार दुईवटा मन्त्रालय पाएको फोरमबाट अध्यक्ष यादव स्वयम सरकारमा जाने तयारीमा छन् । तर, अर्को एक मन्त्री र राज्यमन्त्री छान्न भने उनको पसिना छुटेको छ । फोरमको भागमा सहरी र स्वास्थ्य मन्त्रालय परेको छ ।
 
अध्यक्ष यादवले सहरी रोज्ने सम्भावना रहेको छ । स्वास्थ्यमन्त्री र एक राज्यमन्त्रीका लागि फोरममा लडाइँ सुरू भएको हो । स्वास्थ्य मन्त्री बन्नका लागि महासचिव रामसाह यादव, रेणु यादव, राजेन्द्र श्रेष्ठ, इस्तियाक राई दौडमा छन् । यसैगरी प्रदीप यादव, हरिनारायण रौनियार, उमाशंकर अरगरिया पनि मन्त्रीको आकांक्षी छन् । अध्यक्ष यादव रेणु वा राजेन्द्र मध्ये एकलाई छान्ने मनस्थितीमा रहेको स्रोतको भनाई छ । 

महासचिव रामसाह यादवका अनुसार बुधबार भएको छलफलबाट सुझाव लिने काम भएको छ, आजको बैठकले नाम तय गर्न सक्छ । सबैको प्रतिनिधित्व हुने गरि नाम तय गरिने उनले जानकारी दिए । फाेरमले जेठ १३ गते सरकारमा जान सहमत भएकाे थियाे ।