काठमाडौं– नेपाली कांग्रेसका सांसद देवप्रसाद तिमिल्सिनाले सरकारले रेल र पानीजहाजको झुटो सपना देखाएर स्वास्थ्यजस्तो संवेदनशील क्षेत्रलाई भने उपेक्षा गरेको बताएका छन्।
प्रतिनिधिसभाको आजको बैठकको शून्य समयमा उनले भने, ‘स्वास्थ्य क्षेत्रमा कायापलट भयो भन्नुहुन्छ प्रधानमन्त्रीज्यू। तर भक्तपुर किड्नी सेन्टरको अवस्था हेर्नुभयो भने बिजोग छ। डायलोसिसका बिरामीलाई बस्ने ठाउँ पनि छैन। दैनिक ५० जना आउँछन् डायलोसिसका लागि। उनीहरु बाटोमा बस्न बाध्य छन्।’
प्रधानमन्त्री आफैं किड्नीको बिरामी भएर पनि किड्नीका बिरामीको मर्का बुझ्न नसकेको गुनासो उनले गरे।
किड्नी ट्रान्सप्लान्टका लागि करिब ५ सय प्रतीक्षामा रहेको तर दैनिक एक जनाको पनि नभइरहेको सांसद तिमिल्सिनाको भनाइ छ।