इटहरी- कांग्रेसको भातृ संगठन तरुण दलका सुनसरी सभापति सिजन गुरुङको रिहाइ माग गर्दै बिहीबार जिल्ला बन्दको घोषणा गरिएको छ ।
कुटपिट र जग्गा विवादमा उनी शुक्रबार राति १० बजे पक्राउ परेका हुन् । अदालतबाट सात दिनको म्याद लिएर अनुसन्धान भइरहेको प्रहरीले जनाएको छ । वामपन्थी सरकारले गुरुङलाई फसाउन खोजेको आरोप कांग्रेस जिल्ला समितिको छ । र, १३ जेठदेखि निरन्तर सडक आन्दोलनमा छ ।
दिनहुँ हुने प्रदर्शनमा कांग्रेसका सांसदहरू पनि सहभागी हुने गरेका छन् । प्रदेश–१ का विपक्षी दलका नेता राजीव कोइराला, प्रमुख सचेतक केदार कार्की, सांसद चन्द्र श्रेष्ठ र विन्दिया कार्की जुलुसमा सहभागी भइरहेका छन् ।
यस्तो थियो घटना
इटहरी-२० तरहराकी तीर्थकुमारी गिरीको परिवालाई गुरुङको समूहले कुटपिट गरेको उजुरी प्रहरीमा परेको छ । भिडियो प्रमाणसहितका आधारमा गुरुङलाई पक्राउ गरिएको प्रहरीको भनाइ छ ।
गुरुङ समूहले ०६८ सालदेखि भाडा उठाएर खाएको भनिएको गिरीको १० धुर जग्गा जग्गामा अमिनमार्फत् नापी गर्दा उनलाई कुटपिट गरिएको हो ।
वडाध्यक्ष मणिराम श्रेष्ठ र प्रहरीकै अगाडि भएको कुटपिटबाट गिरीका छोराको अनुहारमा नीलडाम रहेको इटहरीका डीएसपी शिवकुमार श्रेष्ठले बताए ।
केही महिनाअघि किशोरी बलात्कारको घटनामा मिलापत्र गराउन सक्रिय रहेको अभियोगमा पक्राउ परी जिल्ला अदालतबाट पाँच हजार रुपैयाँ धरौटीमा छुटेका थिए ।
कांग्रेसले भने गुरुङलाई प्रहरीले ‘इन्काउन्टर’ गर्न खोजेको आरोप लगाएको छ ।
प्रकाशित: Dec 31, 2017| 18:23 आइतबार, पुस १६, २०७४