राप्रपालाई फेरि एकताको बाडुली

काठमाडौं-पटक पटक फुट्दै जुट्दै गरेको  राप्रपालाई फेरि एकताको बाडुली लागेको छ । 

पार्टी अध्यक्ष कमल थापाको अध्यक्षतामा बुधबार बसेको केन्द्रीय कार्यसम्पादन समितिको बैठकले विचार मिल्ने अन्य दलहरूसँग एकता  गर्ने  निर्णय गरेको छ । 

अन्य दलहरूसँग वार्ता गर्न कार्यदल गठन गरिएको पार्टीका सह-प्रवक्ता मोहन श्रेष्ठले जानकारी दिए । कार्यदलमा उपाध्यक्षद्वय बुद्धिमान तामाङ र टंक ढकाल तथा महामन्त्री राजेन्द्र लिङ्देन छन् । 

प्रतिनिधि तथा प्रदेशसभाको निर्वाचनअघि थापा र पशुपतिशमशेर राणाको नेतृत्वमा विभाजित भएका थिए । राणाको नेतृत्वमा राप्रपा प्रजातान्त्रिक गठन भएको छ । 

दुवै पार्टीले तीन वटा तहका निर्वाचनमा नराम्रो गरी पराजय भोग्नु परेको थियो । दुवै पार्टीले राष्ट्रिय पार्टीको हैसियत गुमाएका छन् । सोही कारण एकीकरणका लागि छटपटी शुरु भएको हो ।