काठमाडौं– सरकारले थोक तथा खुद्रा व्यवसायलाई सेवामूलक उद्योगको सूचीबाट हटाएको छ।
उद्योग वाणिज्य तथा आपूर्ति मन्त्रालयले राजपत्रमा सूचना प्रकाशित गर्दै थोक तथा खुद्रा व्यवसायलाई सेवामूलक उद्योगबाट हटाएको हो।
मन्त्रालयले यसअघि औद्योगिक व्यवसाय ऐन २०७६ मा थोक तथा खुद्रा व्यवसायलाई सेवामूलक उद्योगमा राखेकोमा यही ९ चैतमा राजपत्रमा सूचना प्रकाशित गर्दै यो सूचीबाट हटाएको हो।
औद्योगिक व्यवसाय ऐन २०७६ को दफा १७ को २ को (ज) मा सेवामूलक उद्योगसम्बन्धी व्यवस्था गरिएको छ। यसअनुसार अनुसूची ८ मा दिइएअनुसारका व्यवसाय सेवामूलक हुनेछन्।
अनुसूची ८ को क्रमसंख्या ५६, क्रमसंख्या ५७ का केही शब्द र क्रमसंख्या ६३ का केही शब्द झिकिएका छन्। ५७ मा रहेको ‘विद्युतीय व्यापार (ई–कमर्स) भन्ने शब्द पनि झिकिएको छ। क्रमसंख्या ६३ मा रहेको ‘घुम्ती खाद्य स्टल’ भन्ने शब्द पनि झिकिएको छ।
राजपत्रमा उल्लेख भएअनुसार अब ई–कमर्स व्यवसाय सेवामूलक उद्योग अन्तर्गत नरहने भएको छ । त्यस्तै फुड कोर्ट, क्याटरिङ, घुम्ती स्टल पनि सेवामूलकको सूचीमा रहेकोमा अब घुम्ती स्टल यो सूचीबाट हटेको छ।