काठमाडौं । इन्डियन प्रिमियर लिग (आईपीएल) नेपाली खेल प्रेमीका लागि निक्कै नै चर्चित प्रतियोगिता हो । विगतमा भन्दा यो पटक यसको महत्व अझै बढि रह्यो, कारण थियो नेपाली क्रिकेटर सन्दीप लामिछानेको आईपीएलमा सहभागिता । उनको खेल हेर्नकै लागि पनि धेरै नेपालीले आईपीएल हेरे ।
यो त थियो आईपीएलको रमाइलो पक्ष । तर, अहिले आईपीएलमा सट्टेबाजी गर्ने चर्चित नेपाली नेता, कलाकार र डन प्रहरीको निगरानीमा परेका छन् ।
ठूलो रकमको बाजी लगाएको आरोपमा प्रहरीले मंगलबार पूर्वफुटबलर अञ्जन केसीसहितका ६ जनालाई पक्राउ गरेपछि यो खुलासा भएको हो ।
महानगरीय प्रहरी परिसर काठमाडौंका अनुसार केसीले दुई करोड ७७ लाख पाँच हजार रुपैयाँको बाजी लगाएको प्रारम्भिक अनुसन्धानबाट खुलेको छ ।
यस्तै, दिनेश बोगटीले सात करोड १४ लाख ६२ हजार, गौरव तिवारीले दुई करोड र भुपेन्द्र कुँवरमार्फत् तीन करोडको बाजी लगाएको खुलेको छ ।
काठमाडौं प्रहरी प्रमुख एसएसपी विश्वराज पोखरेलका अनुसार विशेष सुराकीका आधारमा उनीहरूलाई नगद तीन लाखसहित पक्राउ गरिएको थियो । उनीहरूका साथबाट ल्यापटप र मोबाइल बरामद भएको छ ।
केसीसहित गौरव तिवारी, दिनेश बोगटी, नरेन्द्र सुवाल, भुपेन्द्र कुँवर र विजय श्रेष्ठलाई प्रहरीले पक्राउ गरेको छ ।
कलाकार पनि मुछिए
सट्टेबाजीमा चर्चित कलाकार तथा नेताहरुको पनि सहभागिता रहेको पाइएको प्रहरीले जनाएको छ । पक्राउ परेका अभियुक्तको वयानका क्रममा नेपाली चलचित्र तथा टेली चलचित्रमा चर्चित रहेका कलाकारको पनि संलग्नता रहेको पाइएको छ ।
तर, ठोस प्रमाण नहुँदा उनीहरुलाई पक्राउ गर्न नसकिएपछि प्रमाण पाप्त भएपछि पक्राउ गरिने काठमाडौं प्रहरी प्रमुख पोखरेलले बताए । नजिकिँदै गरेको विश्वकपलाई पनि मध्यनगर गर्दै शंकास्पद गतिविधिमा संलग्नहरुको निगरानी प्रहरीले गरिरहने पोखरेलको भनाई छ ।
यसअघि म्याच फिक्सिङ अभियोगमा पूर्वफुटबलर केसीलाई ३० असोज ०७४ मा महानगरीय प्रहरी अपराध महाशाखाले पक्राउ गरेको थियो । उनीविरुद्ध चलाइएको मुद्दा अदालतमा विचाराधीन छ ।
प्रकाशित: Dec 31, 2017| 18:23 आइतबार, पुस १६, २०७४