अखबार समिक्षाः बजेट महत्वाकांक्षी कि निरस ?

काठमाडौं– बुधबार राजधानीबाट प्रकाशित राष्ट्रिय दैनिक अबारहरुले बजेटको विषयलाई मुख्य प्राथमिकता दिएर छापेका छन् । 

सरकारले मंगलबार सार्वजनिक गरेको १३ खर्ब १५ अर्बको बजेटलाई आजको कान्तिपुर दैनिकले वित्तिय अनुशासनको प्रयास शीर्षक दिएर लेखेको छ भने नागरिक दैनिकले ३४ प्रतिशतको महत्वाकांक्षी राजस्व लक्ष्य शीर्षक दिएर छापेको छ । 

कान्तिपुरले लेखेको छ–चुनावी घोषणापत्र र आम अपेक्षाविपरित अर्थमन्त्री युवराज खतिवडाले कम महत्वाकांक्षी बजेट सार्वजनिक गरेका छन् । सांसदलाई चार करोडको दिइएको खबरलाई भने उसले उपशीर्षक दिएर पहिलो पृष्ठमा छापेको छ । 

नागरिकले राजस्व असुलिको लक्ष्य अहिलेसम्मकै सबैभन्दा उच्च राखेर आगामी आर्थिक वर्षको बजेट सार्वजनिक भएका लेखेको छ भने अर्थमन्त्रीले छुट्याएको बजेट र लिएको लक्ष्यलाई बक्स बनाएर छापेको छ । अर्थमन्त्रीले आर्थिक वृद्धि ८ प्रतिशत हुने लक्ष्य लिएका छन् भने मुल्यवृद्धि ६.५ प्रतिशतमा कायम राख्ने प्रक्षेपण गरेका छन् । 

नयाँ पत्रिका दैनिकले भने उत्साही सरकारको निरस बजेट शिर्षकमा मुख्य समाचार छापेको छ । बजेटको आकार नै निराशाजनक, न लोकप्रिय न आयोजन केन्द्रीत, पुरानै ठूला आयोजना तर बजेट छैन्, वृद्धवृद्धा र उत्पीडित समुदायलाई उपेक्षा लगायतका विभिन्न उपशीर्षक दिएर उसले बजेटको खबर छापेको छ ।