समाचार

काठमाडौं मेडिकल कलेजमा एउटा बेडको दैनिक ३० हजार रुपैयाँ

1620149037.jpg

काठमाडौं- सिनामंगलस्थित काठमाडौं मेडिकल कलेज (केएमसी) ले कोभिड बिरामीको उपचारका लागि एउटा बेडकाे दैनिक ३० हजार रुपैयाँसम्म शुल्क तोकेको छ।  कोभिड क्याबिन सिंगल बेडको प्रतिदिन २० हजार, कोभिड क्याबिन डबल बेडको प्रतिदिन १० हजार र कोभिड क्याबिन डिलक्सको प्रतिदिन २५ हजार रुपैयाँ शुल्क तोकिएको अस्पतालले आइतबार जारी गरेको सूचनामा उल्लेख छ। यस्तै कोभिड क्याबिन सुपर डिलक्सको प्रतिदिन ३० हजार रुपैयाँ तोकिएको छ।

काठमाडाैं मेडिकल कलेजले आइतबार जारी गरेको सूचना।

अस्पतालले सरकारकै अनुमतिमा  शुल्क तोकेको दाबी गरेको छ। शुल्क भुक्तानी गरेर क्याबिन सुविधा लिई कोरोना संक्रमितको उपचार गराउन चाहनेका लागि सशुल्क उपचार सेवा उपलब्ध गराउन शुल्क तोकिएको अस्पतालले मंगलबार जारी गरेको विज्ञप्तिमा उल्लेख छ। विज्ञप्तिमा उल्लेख छ, 'यसैको आधारमा सशुल्क क्याबिन सेवा सुरु गरिएको हो।' 

विज्ञप्तिमा कोभिड संक्रमण भएका बिरामीका लागि जनरल बेड, हाई केयर युनिट, आईसीयू, भेन्टिलेटर, बेसिक ल्याब टेस्ट र डाइग्नोस्टिक टेस्ट निःशुल्क व्यवस्था गरिएको उल्लेख छ।

काठमाडौं मेडिकल कलेजका प्रिन्सिपल रतिन्द्रनाथ श्रेष्ठले ननकोभिड बिरामीका लागि मात्र यस्तो शुल्क तोकिएको दाबी गरे। उनले नेपाल समयसँग मंगलबार साँझ भने, 'हामीले ननकोभिड बिरामीका लागि त्यस्तो शुल्क तोकेका हौं। कर्मचारीले कुरा नबुझेर भुलबस यस्तो सूचना बाहिर ल्याएका हुन्। त्यसलाई सच्याइसकेका छौं।'

प्रिन्सिपल श्रेष्ठले कोभिडका बिरामीको उपचार स्वास्थ्य मन्त्रालयसँग भएको सहमतिबमोजिम भइरहेको बताए। उनले भने, 'जनरल बेडमा बस्ने बिरामीले बेड, अक्सिजन, डाक्टर शुल्क, भेन्टिलेटर शुल्क निःशुल्क उपलब्ध छ।' 

काठमाडाैं मेडिकल कलेजले मंगलबार जारी गरेको विज्ञप्ति।

प्रतिक्रिया दिनुहोस्