काठमाडौं– नेपाली कांग्रेसले केन्द्रीय कार्यसमितिको बैठक बोलाएको छ। पार्टीका मुख्य सचिव कृष्णप्रसाद पौडेलका अनुसार चैत २० गतेका लागि केन्द्रीय समिति बैठक बोलाइएको हो।
बैठकको एजेण्डा १४ औं महाधिवेशनको कार्यतालिका रहेको पौडेलले जानकारी दिए। आगामी भदौ ७ गतेदेखि गर्ने गरी महाधिवेशनको मिति तोकिएको छ। तर, महाधिवेशनको तयारीका लागि ल्याइएको कार्यतालिका अनुसार काम हुन सकेको छैन।
चैत १० गतेभित्र क्रियाशिल सदस्यता बुझाइसक्नुपर्ने गरी समयसीमा तोकिएको थियो। तर, सबै जिल्लाले क्रियाशील सदस्यको विवरण सफ्टवेयरमा इन्ट्री गरेका छैनन्। अझै ९ जिल्लाले विवरण भर्न थालेका छैनन्।
कांग्रेसले १४ औं महाधिवेशनसम्ममा १० लाख क्रियाशील सदस्य पु¥याउने नीति लिएको छ। सोही अनुसार क्रियाशील सदस्यता नवीकरण र वितरण गरिए पनि हालसम्म करिब ४ लाखको मात्रै विवरण केन्द्रीय कार्यालयले प्राप्त गरेको छ।
सोमबारको पदाधिकारी बैठकमा समेत क्रियाशील सदस्यताका बारेमा छलफल भएको थियो। बैठकमा केन्द्रीय क्रियाशील सदस्यता छानविन समितिले भएका काम र समस्याका बारेमा ब्रिफ गरेको थियो।
क्रियाशील सदस्यता बुझाउने मिति घर्किइसकेकाले केन्द्रीय समितिको बैठकले म्याद थप गर्ने निर्णय लिने बताइएको छ। यस्तै बैठकमा समसामयिक राजनीतिक परिस्थितिका बारेमा समेत छलफल हुनेछ।