काठमाडौं - कोरोना नियन्त्रण गर्ने भन्दै सरकारले गत वर्ष चैतमा बन्द गरेकाे केराउ, छोकडालगायतको आयात फेरि फुकुवा गरेको छ।
उद्योग वाणिज्य तथा आपूर्ति मन्त्रालयले सोमबार राजपत्रमा सूचना प्रकाशित गर्दै आयात फेरि फुकुवा गरेको हो।
केराउ, छोकडा, सुपारी, नधुल्याइएको मरिच आयात गर्दा निश्चित परिमाणमा मात्रै गर्नुपर्ने मन्त्रालयले जानकारी दिएको छ।
यस आर्थिक वर्षमा केराउ आयात गर्दा ८० हजार मेट्रिक टन, छोकडा आयात गर्दा ५ हजार मेट्रिक टन, सुपारी २५ हजार मेट्रिक टन र नधुल्याइएको मरिच १५ हजार मेट्रिक टन परिमाणमा ननाघ्ने गरी आयात गर्न सकिने राजपत्रमा उल्लेख गरिएको छ।
त्यस्तै सोही राजपत्रमार्फत् ५० हजार अमेरिकी डलरभन्दा बढी मूल्यका सवारीसाधन आयात खुला गरेको छ।
यसअघि गत वर्ष चैतमा सरकारले कोरोना महारीमा नियन्त्रण गर्ने भन्दै लकडाउन गरेको थियो। त्यसपछि यी वस्तुको आयातमा पनि बन्देज लगाइएको थियो।