खेलकुद समाचार

खेलाडीको विवाद नमिलेपछि जन्मिएको थियो इन्टर मिलान

1620093518.jpg
तस्बिरः इन्टरमिलानकाे वेबसाइटबाट।

काठमाडौं - प्रशिक्षक एन्टोनी कोन्टेको छत्रछायाँमा रहेको इन्टर मिलानले इटालियन फुटबलमा पहिलेकै जस्तो अदम्य साहस प्रस्फुटित गरेको छ।

१८ पटकको सिरी ए विजेता क्लबले समग्र इटालियन फुटबलमा रजगज गरिरहेको युभेन्ट‍स‍्काे वर्चस्व तोड्दै मिलान सहरमा खुसी फकार्यो। एक दशकसम्म युभेन्ट‍स‍्ले टुरिनमा कब्जा गरेर राखेको त्यो खुसी उसले आइतबार राति आफ्नो सहरमा फर्काएको हो।

त्यो खुसी फुटबल समर्थकको खुसी हो। त्यो खुसी लिग उपाधि जित्दा खुसी हुनेहरूकै हो। र, त्यो खुसी क्लबले हार बेहोर्दा साथ नछोड्ने समर्थकको पनि हो। हो समग्र मिलान सहरवासीको।

त्यसै पनि युभेन्ट‍स‍्ले कायम गरेको लगातार ९ उपाधिको वर्चस्व मिलानलाई तोड्नै थियो। त्यसैकारण उसले नाम चलेका र बलिया खेलाडी आयात गर्‍याे। रोमेलु लुकाकु, क्रिस्टियन एसिक्सन, एलेक्स सान्चेज, भिक्टर मोसे, बोर्जा वालेरोलगायतका आयातित खेलाडीमा थिए।

ठूलो मूल्यमा खेलाडी अनुबन्ध गरेपछि उसले त्यसको मूल्य पनि पाएको छ। त्यही मूल्य हो १९ औं पटकको सिरी ए उपाधि।

इन्टरका लागि यो उपाधि गर्व गर्न लायक यसकारण पनि हो कि ऊ अब एसी मिलानभन्दा धेरै पटक लिग जित्ने क्लब बनेको छ। एसी मिलानले १८ पटक लिग उपाधि जित्दा त्यही उपाधि इन्टरले १९ पटक जितेको हो।

एउटा निकट प्रतिद्वन्द्वीका लागि कति खुसीको कुरो होला यो। सायद आज इन्टरका समर्थकले महसुस गरे होलान्। त्यसलाई बुझ्न उनीहरूको विगत कोट्याउनु पर्नेछ।

एसी मिलानको क्लबमा विवाद बढेपछि सन् १९०८ मा त्यसका केही सदस्य छुट्टिएर बनेको टिम हो इन्टर मिलान। जसले लगत्तै नेम र फेम पाइहाल्यो। 

सन् १९०६ र ०७ मा एसी मिलानले जितेको इटालियन लिगको उपाधि १९१० मा पहिलो पटक इन्टर मिलानले जित्यो।

अर्थात् छुट्टिएको टिम माउ क्लबभन्दा बलियो देखियो। त्यसयता यी दुई क्लब इटालीका नामी चिर प्रतिद्वन्द्वी बने। सहरी प्रतिद्वन्द्वी। फुटबलको भाषामा भन्दा ‘सिटी डर्बी’ र ‘राइभल।’

त्यसपछि इन्टरले लिग जितिरह्यो। तर उसको राइभलले भने लिग जित्न चार दशक नै पर्खनुपर्‍यो। बल्ल १९५१ मा लिग जित्यो। उसले त्यतिबेला पनि पाँच लिग जित्दा इन्टरले सात उपाधि आफ्नो हातमा पारिसकेको थियो।

त्यसपछि कसले धेरै उपाधि जित्ने भन्ने प्रतिस्पर्धा आज पर्यन्त चलिरहेकै छ।

सन् १९०० को दशकमा एसी मिलानमा पदाधिकारी छुट्टिनै पर्ने विवाद खासै ठूलो भने थिएन। एसी मिलान बनेको १९ वर्षपछि विदेशी खेलाडी ल्याउने सन्दर्भमा क्लबमा विवाद बढेकाले नै इन्टर मिलानको जन्म भएको थियो। त्यसपछि इटालीमा फासिस्ट सरकारसामु उसले आफ्नो नाम प्रयोग गर्न पाएन। र, खेल्यो सोसिएटा स्पोर्टिभा एम्ब्रोसियनाको नामबाट। अन्ततः उसले सन् १९६५ मा उसले आफ्नो पुरानो नाम इन्टर नाजियोनाले फुटबल क्लब फिर्ता पायो।

नाम जुनसुकै होस्। उसले आफ्ना समर्थक गुमाउने गरीको प्रदर्शन कहिल्यै गरेन। उसले नाम फिर्ता पाएको समयमा बल्ल एसी मिलान लिग उपाधि जितेर खेलमा फर्किँदै थियो।

त्यतिबेलासम्म उसले पाँचभन्दा धेरै उपाधि जितिसकेको थियो। अझ भनौँ, १९५० को दशकमा यी दुई क्लबबीच उपाधि जित्ने होड नै चलेको थियो। त्यो १० वर्षमा सात वर्ष उनीहरूले उपाधि मिलानमा राखे। इटालियन फुटबलको केन्द्रमा रह्यो मिलान सहर। इन्टर मिलन र एसी मिलान पनि।

इटालीमा रोमा र नापोलीको वर्चस्व रहँदा पनि नडगमगाएको इन्टर मिलानले कहिल्यै दोस्रो डिभिजनमा झर्नु परेन। उसको एसी मिलानसँगको प्रतिस्पर्धा अझै रोचक छ। उनीहरूले १९५० र ६० को दशकमा ११ सिरी ए उपाधि जिते।

जित्ने लहर च्याम्पियन्स लिगमा पनि उस्तै रह्यो। १९६३ मा एसी मिलानले च्याम्पियन्स लिग जित्यो। त्यही सान सिरो रंगशालामा खेलिरहेको इन्टर मिलानले १९६४ मा पहिलो पटक उपाधि जित्यो।

यसरी हेर्दा लाग्छ, उनीहरूले जे गरे सँगै गरे। एक अर्काबाट सिके। अघि बढ्दा सँगै अघि बढेपछि पर्दा पनि सँगै रहे। इन्टर सन् १९६५ मा लगातार दोस्रो पटक युरोपियन च्यापियन बन्दा एसी मिलानले सन् १९६९ मा उपाधि जित्यो।

त्यसपछि एसी मिलानले च्याम्पियन्स लिगको पाँच उपाधि जितेको छ भने इन्टरले एकपटक जित्यो। र, तीनपटक युरोपा कप जित्यो।

तर, उसले लगातार ११० वर्ष इटालियन शीर्ष डिभिजनको फुटबल खेलिरहेको छ। खेलिरहने मात्र होइन, १९ उपाधि जित्दा उपविजेताको लर्को पनि त्यत्तिकै छ। यसको त्यो यात्रामा पछिल्लो सफलता आइतबार एटलान्टा ससुअलोसँग बराबरीमा रोकिएपछि सम्भव भयो।

पछिल्लो सिजन युभेन्टस् दुःखले उपाधि विजेता बन्दा इन्टर एक अंक मात्र पछि थियो। प्रिमियर लिगको उत्कृष्ट खेलाडी किनेर बलियो बनेको इन्टर गत सिजनको युरोपा लिग फाइनलमा पराजित हुँदा रोमेलु लुकाकु मेडल लिन गएका थिएनन्।

कारण थियो– उनको आत्मघाती गोल। तर, त्यसपछि उनले कहिल्यै कमजोर प्रदर्शन गरेनन्। दुभार्ग्यवश् उसको च्याम्पियन्स लिग यात्रा भने समूह चरणबाट अघि बढ्न सकेन।

तर, जारी लिगमा उसले जसरी खेल्यो त्यो इन्टरको उत्कृष्टमध्येको एक लिग मान्न सकिन्छ। सिरी ए बाट कहिल्यै रेलिगेसन नभएको मिलानका लागि यो सम्झनलायक अर्को क्षण पनि हो।

मिलानको साझा रंगशाला - सान सिरो

सान सिरो रंगशाला। 

जब इन्टर मिलानको कुरा हुन्छ। त्यहाँ एसी मिलान जोडिएर आउँछ। उनीहरूलाई जोड्ने एक अर्को कुरा हो सान सिरो रंगशाला। सन् १९२६ मा स्थापना भएको त्यो रंगशाला सबैभन्दा धेरै दर्शक राख्न सक्ने इटालियन रंगशाला हो।

समग्र युरोपमै छैटौं ठूलो हो। यो रंगशाला इन्टर मिलान र एसी मिलान दुवैको होम स्टेडियमको रूपमा प्रख्यात छ। दुई राइभल क्लबको एउटै रंगशाला ? केही समर्थकले प्रश्न गर्न सक्छन्। 

सत्य यही हो कि १९४७ यता दुवै क्लबले एकै मैदानलाई आफ्नो बताउँदै आएका छन्। तर, यो मैदान कसको भन्ने लाग्नु स्वाभाविक हो। यसको इतिहास हेर्ने हो भने एसी मिलानले १९३५ सम्म यो रंगशाला प्रयोग गरेर स्थानीय खेल परिषद्लाई जिम्मा दिएको थियो।

त्यसको १२ वर्षपछि इन्टरले पनि लगानी गरेपछि ऊ पनि सोही क्लबको मालिक बनेको छ। अर्को रमाइलो पक्ष के छ भने यो रंगशालालाई दुई क्लबले छुट्टाछुट्टै नामले चिन्ने गर्छन्। 

इन्टरका समर्थकले यसलाई गुसियप्पा रंगशाला भन्ने गर्दछन् भने एसी मिलानका समर्थकका लागि मात्र सान सिरो रंगशाला हो। गुइसेअम्मा मेजा ती खेलाडी हुन्, जसले इन्टर मिलानबाट सिरी ए मा २०० भन्दा धेरै गोल गरे। र, इटालीलाई दुईपटक विश्वकप जिताए।

सन् १९५१-५२ मा एसी मिलान र इन्टर मिलान भिड्दै।

उनकै नाममा त्यो रंगशालाको नामाकरण गरियो। तर, एसी मिलानका लागि सान सिरो मैदान सान सिरो मात्र रह्यो।

एउटै सहर। त्यसमाथि साझा रंगशाला। स्थानीय समर्थक बस्ने सहर एकै। यसकारण कुन क्लबको समर्थक धेरै भन्नेमा पनि सधैँ विवाद चल्ने गरेको छ।

त्यसको उत्तर पनि सहज छैन। सन् २००५ देखि २००९ सम्म इन्टर मिलानले विश्वव्यापी रूपमा चार देखि ६ लाखसम्म जर्सी व्यापार गरेको थियो। यता एसी मिलानले ती वर्षहरूमा सोही संख्यामा जर्सी बेचेको थियो।

यसरी हेर्दा त दुवै क्लब उत्तिकै फेमस देखिए। यी दुई दाजुभाइ क्लबको सहयात्रा र विवाद अनन्तसम्म चलिरहने नै छ।

प्रतिक्रिया दिनुहोस्