काठमाडौं- नेपाल क्रिकेट संघ (क्यान)ले चैत २१ गते सुरु हुने ललितपुर मेयर कप महिला क्रिकेटको तालिका सार्वजनिक गरेको छ।
प्रतियोगितामा प्रदेश १, एपीएफसहित लुम्बिनी प्रदेश, सुदूरपश्चिम र ललितपुर मेयर ११ टिम सहभागी हुनेछन्।
क्यानले आज (सोमबार) एक सूचना जारी गर्दै सार्वजनिक गरेको खेल तालिकाअनुसार उद्घाटन खेलमा पीएम कपको फाइनलिस्ट प्रदेश १ ले विभागीय टिम एपीएफको सामना गर्नेछ।
प्रतियोगिताको पहिलो दिनको खेलमा सुदूरपश्चिमले ललितपुर मेयर ११ सँग सामना गर्नेछ।
कीर्तिपुरस्थित त्रिविको क्रिकेट मैदानमा हरेक दिन दुई खेल हुनेछन्। बिहानको खेल ९ बजे सुरु हुनेछ भने दिउँसोको खेल १ बजे सुरु हुनेछ।
त्यस्तै दोस्रो दिनको पहिलो खेलमा एपीएफ सुदूरपश्चिमसँग भिड्नेछ भने दोस्रो खेलमा मेयर ११ लुम्बिनीसँग खेल्नेछ।
२३ गते एक खेलमात्र हुनेछ। सो दिन लुम्बनीले प्रदेश १ को सामना गर्नेछ।
२४ गते पहिलो खेलमा मेयर ११ र एपीएफ भिड्नेछन् भने दोस्रो खेलमा प्रदेश १ ले सुदूरपश्चिमको सामना गर्नेछ।
२५ गते सुदूरपश्चिम र लुम्बिनी भिड्नेछन्।
त्यस्तै लिग चरणको अन्तिम दिन २६ गतेको पहिलो खेलमा प्रदेश १ ले मयेर ११ सँग खेल्नेछ। साथै दिउँसोको खेलमा लुम्बिनीले एपीएफको सामना गर्नेछ।
२७ गते रेस्ट दिइएको छ भने २८ गते लिग चरणका विजेता र उपविजेताले उपाधिका लागि सामना गर्नेछन्।