सेनानी हुँ भन्दै हिँड्ने किशोर पक्राउ

कास्की– नेपाली सेनाको सहायक सेनानी हुँ भन्दै हिँड्ने किशोरलाई प्रहरीले पक्राउ गरेको छ। पक्राउ पर्नेमा मुस्ताङको थासाङ गाउँपालिका–४ का १८ वर्षीय रमेश श्रेष्ठ हुन्। 

उनी पोखरा महानगरपालिका–१४ चाउथेबाट शनिबार पक्राउ परेका हुन्। सोही ठाउँको निर्माणाधिन पोखरा अन्तर्राष्ट्रिय विमानस्थलमा प्रवेश गरी शंकास्पद हर्कत गरेपछि त्यहाँ खटिएको नेपाली सेनाको टोलीले जाँच गर्दा उनी नेपाली सेनामा कार्यरत नभएको पाइएकोले नियन्त्रणमा लिएर जिल्ला प्रहरी कार्यालय कास्कीमा बुझाएको सेनाले जनाएको छ।

प्रहरीले उनको साथबाट नेपाली सेनाको सहायक सेनानी दर्जाको दर्ज्यानी चिन्ह सहित पोसाक (चुस्ता), बुट, श्री भगवतीदल गण पोखरा लेखिएको परिचयपत्र, फ्लाइरोज लेखिएको कालो रंगको नक्कली वाकिटकी रेडियो सेट, मोबाइल र रमेश श्रेष्ठको नामको नेपाली नागरिकताको प्रतिलिपि बरामद गरेको छ।

उनीउपर लिखतसम्बन्धी कसूर अन्तर्गत जिल्ला अदालत कास्कीबाट ७ दिन म्याद थप भई थप अनुसन्धान भइरहेको जिल्ला प्रहरी कार्यालय कास्कीले जनाएको छ।