काठमाडौं– नेपाल क्रिकेट संघ (क्यान)ले क्रिकेटसम्बन्धी अभिमुखीकरण कार्यक्रम गर्ने भएको छ।
आज (सोमबार) सूचना जारी गर्दै क्यानले राष्ट्रिय खेलकुद परिषद्को सहयोगमा क्रिकेट अभिमुखीकरण कार्यक्रम गर्ने बताएको हो।
‘क्यानले राखेपको सहयोगमा राष्ट्रिय टिमका मुख्य प्रशिक्षक डेभ वाटमोरसँग उच्चस्तरीय अभिमुखीकरण कार्यक्रम गर्नेछ,’ क्यानले सूचनामा भनेको छ, ‘यो कार्यक्रम देशका सातै प्रदेशमा हुनेछ।’
क्यानका अनुसार मार्च २४ बाट सुरु हुने कार्यक्रम अप्रिलभरी सञ्चालन हुनेछ। क्यानले पहिले प्रदेश १ मा कार्यक्रम गर्नेछ। ‘हेडकोचलाई सबै प्रदेशमा पुर्याउँदा त्यहाँका स्थानीय खेलाडी उत्साहित हुनेछन्,’ क्यानले भनेको छ, ‘साथै यसले स्थानीय प्रशिक्षकलाई पनि आधुनिक तरिकाले कसरी प्रशिक्षण गर्ने भनेर सिकाउँछ।’