काठमाडौं- नेपाली कांग्रेसका वरिष्ठ नेता रामचन्द्र पौडेल पक्षले नयाँ सरकार गठन र पार्टीको १४ औं महाधिवेशनको तयारीका बारेमा भावी रणनीति बनाउन छलफल गरेको छ।
पौडेल निवास बोहोराटारमा भएको छलफलमा वर्तमान राजनीतिक घटनाक्रम र महाधिवेशनका बारेमा छलफल भएको हो।
प्रधानमन्त्री केपी शर्मा ओलीको विकल्प खोज्ने विषयमा र १४ औं महाधिवेशनमा कसरी अघि बढ्ने भन्नेबारेमा छलफल केन्द्रित भएको छलफलमा सहभागी एक नेताले जानकारी दिए।
‘पछिल्लो राजनीतिक घटनाक्रम र महाधिवेशनका बारेमा छलफल गर्न हामी बसेका थियौँ। अनौपचारिक छलफल भयो,’ ती नेताले भने, ‘अहिलेको राजनीतिक परिस्थितिमा पार्टीको भूमिका, प्रधानमन्त्रीको विकल्प खोज्ने विषयमा पार्टीले अग्रसरता लिनुपर्नेमा हाम्रो जोड छ। पदाधिकारी बैठकमा थप छलफल होला।’
कांग्रेसले १४ औं महाधिवेशन भदौ ७ देखि गर्ने गरी मिति तोकेको छ। तर, महाधिवेशनको पर्याप्त तयारी नभएको र ओलीको विकल्प खोज्न अग्रसरता नदेखाएको भन्दै पौडेल समूह देउवासँग असन्तुष्ट छ।
यसैबीच सभापति देउवाले सोमबार २ बजे पदाधिकारी र पूर्वपदाधिकारी बैठक बोलाएका छन्। बैठकमा समसामयिक राजनीतिका बारेमा छलफल हुने बताइएको छ।