ओलीलाई कार्यकर्ता भेलामा प्रमुख अतिथि बन्न नेपाल–खनाल समूहको आग्रह 

काठमाडौं– एमाले माधव नेपाल–झलनाथ खनाल समूहले प्रधानमन्त्री केपी शर्मा ओलीलाई राष्ट्रिय भेलामा प्रमुख अतिथिका रूपमा सहभागी हुन आग्रह गरेको छ।

उक्त समूहले चैत ४ र ५ गते राजधानीमा राष्ट्रिय भेला आयोजना गरेको छ।

समूहका प्रचार विभाग प्रमुख योगेश भट्टराईले भोलिदेखि सुरु हुने भेलामा सहभागी हुन ओलीलाई आग्रह गरेका हुन्।

भेलाबारे जानकारी दिन आयोजित पत्रकार सम्मेलनमा भट्टराईले भने, 'प्रधानमन्त्रीज्यू, तपाईंलाई भेलाको प्रमुख आतिथ्यका लागि आग्रह गर्दछु। त्यहीँ आएर कार्यकर्ताको आवाज सुन्नुहोला।’ 

प्रचार विभाग प्रमुख भट्टराईले ओलीलाई आवेग र उत्तेजनामा नआउन आग्रह गरे।

उनले भने, ‘बुद्धको देशमा शान्ति र सत्यको भाषा हुन्छ। प्रधानमन्त्रीजीसँग शक्तिको भाषा छ, त्यसलाई बदलेर शान्तिको भाषा बोल्न आग्रह गर्दछु। संयम हुन आग्रह गर्दछु।’

यसैगरी नेपाल–खनाल समूहले ओलीले कारबाही गर्दैमा आफूहरूलाई कुनै फरक नपर्ने स्पष्ट पारेको छ। 

भट्टराईले भने, ‘कारबाहीले राजनीति र पार्टी अगाडि बढ्दैन। हामी सबैमाथि कारबाहीको कुरा अहंकारपूर्ण अभिव्यक्ति हो। हामी एकपछि अर्को कारबाही सहन तयार छौं।’

उनले मुलुक र जनताको पक्षमा उभिएका आफूहरूका लागि कारबाही सहन कुनै पश्चात्ताप नरहेको बताए।

भट्टराईले पार्टीमा संकट उत्पन्न हुनुमा ओली नै जिम्मेवार रहेकाले उनले इतिहासले सोधेका धेरै प्रश्नको उत्तर दिनुपर्ने बताए।

उनले भने, ‘त्यो बेला तपाईंका निम्ति दुई थोपा आँखा चुहाउने मान्छे नहुन सक्छ। त्यसैले संयम हुन आग्रह गर्दछु।’ 

भट्टराईले ओलीलाई दुई वर्ष बाँकी रहेको कार्यकाल चयनका साथ बस्न पनि आग्रह गरे। उनले भने, ‘शक्तिमा बसेर बारुदको गन्ध नल्याउनुहोस्। यसले दुर्घटनातिर निम्त्याउनेछ।’

भट्टराईले ओलीको हातबाट पार्टी क्षतविक्षत हुन नसक्ने आशा व्यक्त गरे। उनले भने, ‘हामी आशा गर्छौं, तपाईंको हातबाट पार्टी क्षतविक्षत हुने छैन। सकुशल अर्को पुस्तालाई हस्तान्तरण गर्न सकौं।’
 

याे पनि : नेता–कार्यकर्तालाई एमाले अध्यक्ष ओलीको निर्देशन– गुटगत भेलामा नजानू