समाचार

निषेध आदेश उल्लंघन गर्ने तीन जना जेल चलान

1606989490.jpeg
सांकेतिक तस्बिर।

बुटवल- कोरोना भाइरस नियन्त्रणका लागि रुपन्देहीमा गरिएको निषेध आदेश उल्लंघन गरेको अभियोगमा नेपालमा पहिलोपटक कैद सजाय गरिएको छ। 

निषेध आदेशका बेलामा सवारीसाधन चलाएको अभियोगमा पक्राउ गरिएका सात जनालाई संक्रामक रोग ऐन २०२० को दफा ३ को उपदफा २ बमोजिम जिल्ला प्रशासन कार्यालय रुपन्देहीले तीन जनालाई कारागार चलान गरेको हो। 

कारागार चलान हुनेमा रुपन्देही मायादेवी गाउँपालिका–४ का २७ वर्षीय दिनेश यादव, सिद्धार्थ नगरपालिकाका–८ का २८ वर्षीय श्याम दुवे र मायादेवी गाउँपालिका–२ का ३४ वर्षीय महेन्द्र कोहार छन्।

७ जनालाई सजाय तोकिएकोमा चार जना भने ९ हजार १ सय रूपैयाँ रकम बुझाएर रिहा भएको जिल्ला प्रहरी कार्यालय रुपन्देहीका प्रहरी प्रवक्ता तथा प्रहरी नायव उपरीक्षक सत्यनारायण थापाले जानकारी दिए। 

प्रहरीले सम्झाइबुझाइ गरी कोरोना नियन्त्रणमा गाडी नचलाउन आग्रह गर्दा उल्टै प्रहरीमाथि नै जाइलागेका कारण पक्राउ गरी मुद्दा चलाइएको प्रहरी प्रवक्ता थापाको भनाइ छ।

'आठ जनालाई पक्राउ गरिएको थियो। एक जना महिलालाई ६ सय रूपैयाँ मात्रै जरिवाना तिराएर छाडिएको हो,' उनले भने, '७ जनालाई भने कारबाहीका लागि जिल्ला प्रशासनमा बुझाएका थियौँ'

हामीले कोरोना भाइरस नियन्त्रणका लागि निषेध आदेश पालना गराउनका लागि प्रहरीले पक्राउ गरी कारबाही चलाएको उनको भनाइ छ। 

निषेध आदेशको पहिलो दिन बिहीबार उनीहरूलाई पक्राउ गरिएको थियो। बिहीबार निषेध आदेश उल्लंघन गर्ने एक हजार २० वटा सवारीसाधन तथा एक हजार ४७० जना नागरिकलाई सम्झाइबुझाइ गरिएको प्रहरीले जनाएको छ। 

रुपन्देहीमा आगामी ३० गते बिहान ६ बजेसम्म प्रशासनले निषेध आदेश जारी गरेको छ। रुपन्देही जिल्लामा दुई हजार ५५२ जना कोरोना संक्रमित उपचाररत छन्। 

प्रतिक्रिया दिनुहोस्
थप समाचार
लेखकबाट थप
ताजा अपडेट