काठमाडौं– आइफोन–१२ अब भारतमै बन्न थालेकाे छ। अमेरिकी कम्पनी एप्पलले भारतमा आइफोन–१२ एसेम्बल गर्न थालेको हो।
बिहीबार एप्पलले सूचना जारी गर्दै भनेको छ, ‘स्थानीय ग्राहकका लागि हामीले भारतमै आइफोन–१२ तयार गर्न थालेका छौं।’
भारतले एप्पलको निर्णयलाई स्वागतयोग्य भनेको छ। एप्पलको ताइवानी पार्टनर फक्सकनले भारतको तमिलनाडुस्थित एप्पलको प्लान्टमा आइफोन–१२ एसेम्बल गर्नेछ।
अमेरिका र चीनबीच व्यापारिक द्वन्द्व बढिरहेका बेला एप्पलले भारतमा एसेम्बल प्लान्ट स्थापना गरेको हो। समाचार एजेन्सी रोयटर्सका अनुसार एप्पलले केही आइप्याडको एसेम्बलिङ पनि भारतमै गर्ने तयारी भइरहेको बताएको छ।