काठमाडौं– प्रधानमन्त्री केपी शर्मा ओलीले खड्गबहादुर विश्वकर्माको उपनामका बारेमा ठट्टा गरेका छन्। सरकार र नेत्रविक्रम चन्द ‘विप्लव’ समूहबीच भएको सहमतिपत्र हस्ताक्षर कार्यक्रममा बोल्दै उनले ठट्टा गरेका हुन्।
उनले कार्यक्रममा उपस्थित नेताहरुलाई सम्बोधन गर्दै ठट्टा गरे। ‘वार्ता टोलीका संयोजक खड्गबहादुर विश्वकर्मा, प्रकाण्ड हो क्यारे नाम। प्रकाण्डज्यू !,’ उनले भने।
आजैमात्र थुनामुक्त भएका विप्लव समूहका नेता धर्मेन्द्र बास्तोलाका बारेमा समेत उनले ठट्टा गरे। ‘आजै छुट्नुभएका धर्मेन्द्र बास्तोलाज्यू ! यति छोटो समय जेल बसेर छुट्न पाए पो हुन्थ्यो। हाम्रो त चौध वर्ष !’
पटकपटक पक्राउ पर्दै छुट्दै आएका बाँस्तोलमा आज अन्तिमपटक धुलिखेलबाट छुटेका थिए। उनलाई श्रीमतीले हात मिलाएर स्वागत गरेकी थिइन्।