राशिद खानले जिम्बाब्वेविरुद्धको टेस्ट गुमाउने

काठमाडौं– अफगान स्पिनर राशिद खानले जिम्बाब्वेविरुद्धको टेस्ट क्रिकेट गुमाउने भएका छन्। पाकिस्तान सुपर लिग (पीएसएल)को दोस्रा खेलमा उनलाई औंलामा चोट लागेपछि आउँदो टेस्ट गुमाउने भएका हुन्।

उनको बलिङ गर्ने हातको बीचको औंला फ्र्याक्चर भएको छ र त्यो चोट निको भएको छैन। यसकारण आउँदो मंगलबारबाट अबुधाबीमा सुरु हुने दुई खेलका सिरिजको पहिलो खेल उनले गुमाउने छन्।

यद्यपि यसबारे अफगान क्रिकेट बोर्डले स्पष्ट जानकारी भने दिएको छैन। गएको फेब्रुअरी २२ मा लाहोर कलन्दर्स र क्वेत्ता ग्लाडिएटर्सबीच सम्पन्न खेलमा उनलाई चोट लागेको थियो।

क्रिस गेलको हार्ड हिट स्ट्रोक रोक्दा राशिदको औंलामा चोट लागेको थियो। यसकारण उनी मैदानबाट बाहिरिएका थिए।